Chak nei loin Lakers an tla
Los Angeles Lakers chuan nimin zing khan Conference semifinals game 4-ah 115-110 in Oklahoma City Thunder an hneh lo a, seven game series-ah chak nei loin 4-0 in Thunder an ngam lo. Thunder erawh champion nawn turin an dinhmun a ṭha hle.
Crypto.com Arena, Los Angeles-a inkhelah Lakers-in bul an ṭan ṭha zawk a, Austin Reaves-a kut a kal nghal avangin 26-21 in first quarter-ah hma an hruai. Mahse, Lakers hi second quarter-ah an inthlahdah a, first hald-ah 45-49 in OKC-in hma an hruai let.
Third quarter-ah Lakers-in hma an sawn leh deuh a, point 39 score-in 84-80 in an hma an hruai nawn. Fourth quarter-ah team pahnihten hma an inhruai chhawk zak zak a, Lakers-in game 5 khelhpui an tum laiin OKC-in game dang khelh ngai loa tlang an tum.
Hun tawp dawn hnaiah boruak a sang a, Lakers tan Marcus Smart-a'n a zawnin four points play leh three points play a rawn neih avangin Lakers an phur a, an chak mai a rinawm hman. Mahse Chet Holmgren-a'n a chhanglet ve nghal a, LeBron James-a vawm chu a lut lo zui. A tawpah erawh OKC an dingchang zawk.
Thunder tan MVP ni lai Shai Gilgeous-Alexander-a'n point 35 teh meuh a score a, MVP ni nawn turin kawng dik a zawh. SGA bakah Holmgren (16) leh Ajay Mitchell (28) ten OKC final luh nan an thawh hlawk tak zet. OKC hi finals lut thei pahnihna an ni chiah a, anmahni hma hian New York Knicks chuan finals an lo inhlangkai tawh.
Lakers tan Luka Doncic awm loh a lang zel a, Reaves (27), Rui Hachimura (25), LeBron (24) leh Jaxson Hayes (18) te khel chhe lo mah se an ṭhiante puihna an dawng ṭha tawk lo a, anni bak hi Lakers player zingah point 10 score tling an awm lo a, an chak loh chhan lian tak pakhat a ni.
Inkhel dangah nimin zing vek khan Cleveland Cavaliers chuan 112-103 in Detroit Pistons an hneh a, Cavaliers tan Donovan Mitchell-a'n point 43 a score a, series-ah 2-2 a an inhnehtawk theih nan a pawimawh hle. Cavs leh Pistons te hi May 14, Ningani zing dar 5:30-ah an inhmachhawn leh dawn a, vawi hnih chak an la mamawh ve ve avangin inkhel hmuhnawm a beisei ngam.