PSG champion zan a ni dawn em?

Ligue 1 hmawr bawk a hnai zel a, zanin dar 12:30-ah hmahruaitu Paris St-Germain chuan anmahni hnaih bertu RC Lens chu an lenchilh dawn a, PSG tan champion turin draw a tawk laiin Lens tan chak ngei ngei a ngai a, inkhel hmuhnawm an chhawpchhuah a rinawm.

Tun season-ah PSG an khel chhe lo a, mahse chetsual an chin bakah Lens an khelh ṭhat avangin league-ah an la champion thei lo. Lens lakah an hmahruaina an hloh ngun hle.

Chutihrualin Lens pawh an inthlahdah avangin pakhatnaah an awm rei thei lo a, a umtu zawkah an ṭang leh ṭhin. An intawn hmasak zawkah Bradley Barcola goal hnih hmangin PSG an chak a, zaninah Lens-in chak loh nawn an duh dawn lo.

PSG tan Achraf Hakimi hmun ruak hnawh khattu Warren Zaire-Emery chu hnungzang na vangin a dinhmun a chiang lo a, an match hnuhnung berah pawh squad-ah a awm lo a, a aiah Senny Mayulu a lut. Mayulu hi khel ṭha mah se Zaire-Emery leh Hakimi hi an dam vat loh chuan Ligue 1 title leh Champions League nomawi an chân kawp thei.

Luis Enrique-a'n UCL semifinal an khelh lai aṭang tawhin a player rinrawlte league lamah a hahdamtir ṭhin a, zaninah erawh an champion theihna match an khelh dawn avangin bench-ah player pawimawhte a ṭhuttir a rinawm loh a, Khvicha Kvaratskhelia, Desire Doue, Ousmane Dembele leh Vitinha te hoin bul an ṭan a beiseiawm.

Hetihlai hian Lens pawh an ṭhat dan berin an inlan thei dawn lo a, goal 10 khung tawh Florian Thauvin leh goal thum khung tawhtu Allan Saint-Maximin te chu an inhliam avangin an dinhmun a chiang lo.

Newcastle United forward hlui pahnih hi awm lo mah se, Crystal Palace forward hlui Odsonne Edouard an nei a, Edouard hian goal 12 a khung tawh a, goal 10 khung tawh Wesley Said nen an inkawp leh dawn a, PSG tan zuam chi an ni lo.

Tlarhnung lamah Chelsea defender hlui Malang Sarr a awm dawn a, West Ham United tan pawha khel tawh Arthur Masuaku an neih tel bawk avangin PSG lakah an zam dawn lo a, an beiseina thi ṭep tawh chu tihnun thar an tum dawn.