Girona an la him lo
Thawhṭanni zan La Liga inkhelah Rayo Vallecano leh Girona te chu 1-1 in an inhnehtawk a, Girona hi an chak zawh loh avangin 17-naah an awm a, relegate thei dinhmunah an ding.
Estadio de Vallecas-a inkhelah goal a lut har a, minute 86-naah mualneitu Vallecano tan Unai Lopez-a shot chu, Alemao-a'n dang pialin goal-ah a lut a, Girona keeper Paolo Gazzaniga tan dan ngaihna a awm lo.
Vallecano an chak tawh mai dawna a lan laiin Girona-in goal an khung ve a, minute 90-naah Cristhian Stuani-a'n corner aṭangin a tauh lut a, an si phurh a sut hram. Stuani hi kum 39 mi ni tawh mah se a team tan mamawh channa a la ni thei.
Girona hian hnehna chang se 13-naa awm thei tur an ni a, mahse an chak zawh loh avangin point hmuh zat inangah, an goal difference a chhiat avangin an chunga mite aiin an hniam zawk.
La Liga-ah match thum chiah khelh tur a awm tawh a, inhamtan an duh chuan an chetsual a thiang tawh lo. Vallecano erawh 10-naah an awm a, chhiarkawp danah relegate thei la ni mah se La Liga khel chhunzawm turin an dinhmun a ṭha tawh zawk.