Koeman-a'n Rashford la nghet turin Barca a duh

Spanish champion Barcelona coach hlui Ronald Koeman chuan, Manchester United aṭanga an hawh Marcus Rashford chu a ngheta la turin a duh a, United-ah an let tir leh a nih chuan an inchhir tur thu a sawi.

Catalan club boss hlui chuan, "Rashford hi a loan term a zawh hnua Manchester United-a an lettir a nih chuan Barca hi an la inchhir khawpin ka ring. Tun ang laia pound maktaduai 30 vela hetiang player, tawnhriat ngah leh thiam lei theih chu pheichham man ang a ni ringawt alawm.

Rintlak a nihzia chu El Clasico-ah a lantir tawh a, a thiamna hmangin Real Madrid tan buaina a thlen a nih kha. Chuvangin a ngheta an la lo a nih chuan a âtthlak hlein ka ring, " a ti.

Tun season-ah Rashford a che ṭha a , Barca tan match 47 inlanah goal 14 leh assist 14 a nei thei a, goal 28-ah inrawlhin La Liga title an hum him theih nan player pawimawh a ni.

Barca hian English forward hi pound maktaduai 30-a lak ngheh theih dan an nei a, Rashford hi Old Trafford-ah a tlaktlum tawh loh avangin Barca tan hun ṭha a ni.

El Clasico-a goal khungtu Rashford chuan, "He hmunah hian nomawi chawi tuma lo kal ka ni a, Barca hi team ropui tak an ni a, season tharah phei chuan nomawi an chawi nual ka ring. Chuvangin, heta cham hi thil ṭha tak ni dawnin ka hria," a ti a, ani pawhin cham zui zel a hreh lo.

A lâr ṭanna a rei tawh viau nain Rashford hi kum 28 chauh a la ni a, a vanglai hun a hmang mek. Rashford chungchangah Barca leh United-in thuchhuah an la nei lo a, Rashford hma hun a la chiang lo.