ISL: Bagan an tawlhthlu ve leh ta!

East Bengal tawlhthluk hnu lawka inlan Mohun Bagan-in ISL table chung ber luahna remchang nei mah se, an tawlhthlu ve leh a, Thawhlehni zan khan an mikhual Inter Kashi chu 0-0 in an inhnehtawkpui.

Mohun Bagan tan Lalengmawia Ralte (Apuia) chu hliam vangin a inlan thei lo. Vaivakawn tlangval hi hliam vanga a chawlh vang vang hnuah, FC Goa nen 1-1 a an inhnehtawkna inkhelah khan a inlan a, mahse, duhthusama a la dam chian loh avangin Inter Kashi lakah hian squad-ah pawh a awm lo.

Tarlan tawh ṭhin angin tun season ISL-ah match 13 chauh khelh a ni dawn a, East Bengal leh Mohun Bagan hian match 11 ve ve khel tawhin, point 22 ve ve an nei - champion tur a la chiang lo hle.

May 17, Pathianni zan dar 7:30-ah Mohun Bagan hian East Bengal an mikhual dawn a, hei hi 'final' ang hiala sawi theih a ni dawn - ṭum dang zawng aiin Kolkata derby a 'hot' lehzual dawn tihna a ni.

Apuia chuan, "Ka hliam a la dam chiang hleithei lo. Mahse, Kolkata derby hi chu min khelhtir ngei an tum," a ti a, Bagan-in an midfielder ṭha tel loa an hmelma club hmachhawn an tum lo.

ISL-ah hian pathumna Jamshedpur tan pawh champion beiseina a la awm. Hetihrual hian point khat chuahin East Bengal leh Bagan phak lo mah se, match khatin an khel tam zawk a, club pahnih chetsual an chân tel a ngai tawh dawn.

Men of Steel tan champion tur chuan, an match tawp bera an chak a, Bagan leh East Bengal an inhnehtawk a, match khat danga an tlawm ve ve a ngai tel - beiseina a la awm a, harsat erawh a harsa deuh dawn.