Flick-a'n contract thar ziak

Barcelona coach Hansi Flick chuan Camp Nou-a cham chhunzawm zel turin contract thar a ziak a, a contract neih sa chu kum khat danga pawt seiin, kum 2028 thleng Barcelona-ah hian a cham dawn.

Kum 61 mi coach hian kum 2024 khan Barcelona hi enkawl ṭanin, season hnih a kaihhruai tawhah league nomawi a chawipui ve ve. A contract neih lai ang chuan season khat dang hun a la nei.

Mahse, Barca a champion pui leh takah chuan contract thar pek a ni a, kum khat atan pawhsei a nih bakah, a ṭul dan a zira kum khat dang pawhsei leh theihna dan pawh an ziak tel.

Flick chuan, "Ka hlim takzet a, hlawhtling zel tura min rintawkzia an lantir a ni. Coach tam tak chuan, kum thum emaw, kum li emaw, kum nga emaw contract an duh mai thei.

"Mahse, tuna Barca dinhmun thlir chuan thui tak tih kher loh hi a ṭha zawk a, min rin tawknaah ka lawm hle a ni," a ti.

Barca hi suma tlachhia, indinthar hna thawk mek an ni a, Flick pawh hian kum khatah euro maktaduai thum bak a hlawh lo niin an sawi - Champions League nomawi chawi ta se, €1mtd pek belh tur a ni a, La Liga nomawi a chawipuiin bonus €750,000 a dawng bawk.

Flick-te ang coach ṭha tan chuan hlawh tlem tak a ni, a tih loh theih loh a, a contract tharah pawh hian La Liga dan nena a inmil thlap a ngaih avangin a hlawh tam viau a rinawm chuang lo.

German coach chuan, "Kum 2028 thleng kan thawk ho leh phawt dawn a, kan beisei anga thil a kaltluan chuan, kum khat dang a la pawhsei theih bawk - club leh keiman thuneihna kan nei ve ve dawn. Contract ṭha tak niin ka hria," a ti a, a lawm.

Flick hian nikum khan Barca hi Copa del Rey-ah a champion pui bawk. Germany coach angin hlawhtling lo mah se, Bayern Munich-a season hnih a cham chhungin league nomawi a chawi ve ve tawh bawk - kum 2020-ah phei chuan treble champion an ni hial.