Ben White-a tan season a tawp

Arsenal defender Ben White chu khup hliam vangin season tawp thleng a inlan thei tawh dawn lo a, World Cup-ah England tan a feh chhuak thei dawn lo chiang bawk tihna a ni.

Kum 28 mi defender hi kartawpa West Ham nena an inkhelah khan hliam vanga lakchhuah a ngai a, World Cup hmain a dam hman dawn ta lo.

Gunners chuan thuchhuah siamin, "Kan medical team-te chuan uluk takin Ben an enkawl chhunzawm dawn a, pre-season inbuatsaihnaa a tel hman ngei theih nan theihtawp an chhuah dawn a ni," an ti.

Kum 28 mi defender hian tun season-ah Gunners tan inelna hrang hrangah match 30 a khel a, league match kuaah chiah bul ṭan mah se, tun hnaia Arsenal match pangaah bul a ṭan vek thung.

London club hi Premier League champion thei dinhmunah an ding mek. May 18, Thawhṭanni zanah Burnley mikhualin, May 24, Pathianni zanah Crystal Palace an lenchilh dawn a, match hnihah hian an chak ve ve chuan Premier League champion an ni ang.

Gunners hian May 30, Inrinni zanah Champions League final an khel zui dawn a, Paris St-Germain chu khualmualah an lenchilh dawn - EPL leh UCL nomawi an chawi kawp lo ang tih a sawi theih loh.

Ben White erawhin an match pawimawh pathum a khel dawn lo tihna a ni a, Thomas Tuchel-a'n May 22-a World Cup squad-a puan hunah Three Lions squad-ah a tel dawn lo chiang tihna a ni bawk.