Wemby hoin Spurs-in hmahruai nawn

Game 4-ah hnawhchhuah ni mah se, Victor Wembanyama chu ropui takin a rawn let leh nghal a, nimin zing khan San Antonio Spurs chu 126-97 in Minnesota Timberwolves lakah hnehna chanpuiin, seven game series-ah 3-2 in hma an hruai.

Frost Bank Center, San Antonio-a inkhelah a tir aṭangin Spurs an khel ṭha nghal a, bul an ṭan ṭhat bakah inkhel an thunun tluan zak. First quarter-ah Wemby-a langsar nghal a, defence-ah a ṭangkai bakah points a nghah tel a, first quarter-ah point 18 nei nghalin 34-30 in Spurs hma a hruaipui.

Second quarter-ah Spurs defence a ṭhat avangin, Wolves player ten point score an harsat a, an basket a tang rei thei hle. Spurs erawh an khel ṭha chhunzawm a, 59-47 in hma an hruai chhunzawm a, an inthlauh lai berin point 15-in an fal hman. Third quarter-ah Wolves-in hmasawn hret a, an kut kal deuh mah se Spurs an inthlahdah bik lo a, 91-73 in an hmahruaina an tizau a, point 18 zetin hma an hruai.

Fourth quarter-ah quarter dang zawng aiin Spurs an khel ṭha a, point 35 zet score-in an chungnung zawk. Spurs defence a khawng ṭhat avangin Wolves player te an che hleithei lo a, point 29 zeta phâk loin a tlawm zawkah an ṭang.

Spurs tan Wemby a 'comeback' a pui a, point 27 neiin a score sang ber a, rebound vawi 17 zet a la bawk. Game 4-ah Naz Reid a nghawk avangin Wemby hnawhchhuah a ni a, Spurs an chak lo zui. Mahse game 5-ah a hnual phah lo a, French center hian point a score hnem bakah defence a pui ṭha a, a ṭhiante tan hmun awl a siamsak ṭhain Spurs chakna hnar a ni.

Wemby hi a ṭhianten an thlawp ṭha a , Keldon Johnson (21), De'Aaron Fox (18), Stephon Castle (17), Dylan Harper leh Devin Vassell (12) te an khel ṭha a, Spurs chak nan an thawh hlawk takzet. Spurs hian 3-2 a hma an hruai tawh avangin finals lut turin vawi khat chiah chak an mamawh tawh.

Wolves erawhin an game hmasa an pha lo a, an thiampuipa Anthony Edwards (20), Jaden McDaniels leh Julius Randle (17) bakah Ayo Dosunmu (16) ten theihtawp chhuah mah se Spurs an ngam lo hle. Wolves hi game 6-ah an chak lo leh a ni chuan an tla tawh dawn a, Conference finals khelh an duh a nih chuan hnual hman an ni lo a, an thawhchhuah leh nghal a ngai.

Conference finals-ah team pahnih - New York Knicks leh Oklahoma City Thunder te an lut tawh a, team pahnihte hnung zui turin Spurs-in kawng dik an zawh a, Wolves-in final lut turin thi leh thau pawlha an khelh a ngai tawh dawn thung. Anni bakah hian Detroit Pistons leh Cleveland Cavaliers ten finals luh an inchuh mek a, team pahnihte hi 2-2 a inhnehtawk mekin tukin zing dar 5:30 khan game 5 an khel a, an result kan hre hman lo.