El Paso Locomotive-ah Ted Lasso actor lut

American drama lar Ted Lasso changtu zinga mi Cristo Fernandez chu, American second tier club El Paso Locomotive-ah thla hnih chhung trial a neih hnuah a lut a, Mexican actor hian football a khel dawn.

Kum 35 mi Fernandez hian a naupan laiin an ram club Guadalajara tan a khel ṭhin a, mahse a khup hliam vangin kum 15 mi chauh niin inkhelh a chawlhsan. Hemi hnu hian London-ah insawnin lemchan lamah a lut a, 2020-a chhuak Ted Lasso-ah Dani Rojas-a character chu changin khawvel hriat a hlawh.

Fernandez chuan, "Football hian ka nunah hmun pawimawh tak a chang reng ṭhin a, mahse professional nih hi ka lo suangtuah pha ngai lo. He club (El Paso Locomotive) coach leh a thawktute bakah, a bik takin ka khelhpuite chungah ka lawm em em a, ka inkhelh theihna tura kawng min rawn hawnsak avangin ka lawm hle a ni.

Professional football-a ka let leh hi mahni inrintawkna bakah, ka thil lo suangtuahte a taka thleng a ni a, inelna sanga ka khel tur hi mumang pawh a ang zawk hial, " a ti.

Locomotive head coach Junior Gonzalez chuan, "Cristo hi kan club tana ṭangkai tak tur a ni a, tlarhma lamah goal kan nawrna kawngah thahrui thar min rawn belh dawn a avangin kan phur hle," a ti bawk.

Fernandez-a khelhna tur El Paso Locomotive hi, USA-a football league sang ber dawttuah an khel mek a, Major League Soccer hnuai chiah an ni. Fernandez hian hi kumin kum tir lam khan Major League Soccer club, Chicago Fire second team tan pawh trial a lo nei tawh.