Kum 20 hnua UCL khel tur Betis

Thawhlehni zan La Liga inkhelah Real Betis chuan 2-1 in Elche an hneh a, panganaah an dinhmun sawh nghetin an hnuai chiaha awm, Celta Vigo-in an lehpel thei tawh lo a, season tharah Champions League khel turin an tling.

Mahni muala khel Betis-in goal an khung hma a, minute kuana lekah Cucho Hernandez-a'n cool takin an hmahruaina goal a khung a, Betis an phur hle. Mahse mikhual Elche an zam lo a, first half tawp hma hretin Hector Fort-a shot chu Junior Firpo-a'n dang pialin goal-ah a lut a, an siphurh an sut .

Goal khung mah se Elche an vanduai a, minute 49-naah Leo Patrot-a'n hlauhawm taka Antony a tlawh avangin hnawhchhuah a ni. Player tam zawk Betis-in inkhel an thunun chhunzawm a, minute 68-naah Pablo Fornals-a'n mawi taka pet lut a, West ham United forward hlui goal hi Betis chakna a ni zui.

Hnehna an chan avangin Betis hian point 57 hmuin panganaah an awm a, anmahni umtu Celta Vigo chuan point 50 hmuin match hnih khelh tur la awmah an umpha thei tawh lo a, Manchester City coach hlui Manuel Pellegrini hoin Champions League an khel dawn.

Betis hian UCL an khelh hnuhnun ber chu 2005 daih tawh kha a ni a, group stage an paltlang zo lo. Kum 20 hnuah Europe inelna sang an khelh leh dawn avangin an phur hle. Tun season-ah Spanish club te Europe inelnaah an chet ṭhat avangin panganain UCL an khel thei dawn a, hei hi Betis-in an vanneihpui.