Southampton-in playoff final khel dawn

Premier League khel tur zawnna playoff-ah Thawhlehni zan khan Southampton chuan playoff semifinal second leg-ah 2-1 in Middlesbrough an hneh a, first leg-ah goal khung loa inhnehtawk a, Saints-in final an inpetkai.

St Mary's Stadium-a inkhelah mikhual team Middlesbrough-in goal an khung hmasa zawk a, minute ngana lekah Callum Brittain cross satliah chu Riley McGee-a'n pet lutin a team hma a hruaipui a, Southampton an inring hman lo.

Goal an chhuah hnuah Saints an chungnung zawk a, first half injury time-ah Ross Stewart-a'n tauh goal-in an siphurh a sut a, chawlhlawkah 1-1 a ni.

Second half-ah Saints an khel ṭha chhunzawm a, vawi tam Boro tlarhnung rum ṭhaih mah se goal an khung thei lo a, goal hmaah an hriam tawk lo. Hun tawp thlenga goal dang a luh tawh loh avangin extra time an khel.

Extra time-ah pawh team pahnihte an fimkhur a, goal chance hmuh tur a awm tam lo. Mahse mualneitu an vannei zawk a, penalty an pet dawn emaw tih hnuah goal an khung.

Minute 116-naah Shea Charles-a'n mual dinglam aṭanga a ball vawrh luh chu, Boro defender Taylor Harwood Bellis-a'n tauh ṭhelhin goal-ah a lut a, Southampton chakna goal a ni zui.

Southampton hi May 23, Inrinni zanah Hull City nen an inhmachhawn dawn a, a chak zawk zawkin Premier League an khelh dawn avangin inkhel boruak a sang dawn.