Gokulam an him, Namdhari an tla

Indian Football League-ah Gokulam Kerala-in injury time-a Trijoy Savio Dias goal hmangin Namdhari 1-0 in an hneh a, I League champion tawh Kerala club hi IFL khel zel turin an him. Punjab club erawh relegation playoff-ah table mawngphahah awmin an relegate thung.

Deccan Arena, Hyderabad-a inkhelah Gokulam tan IFL-a inhamtang turin chak ngei a ṭul a, Namdhari tan erawh 'draw' a tawk thung. Punjab club-in goal khungna remchanga an nei hmasa zawk a, Gokulam keeper Shibinraj Kunniyil-a'n ṭha takin inkhelh ṭantirhah a dang nghal.

Namdhari-in defensive game khelh an tum bik lo a, team pahnihin chance inneih chhawk mah se first half-ah goal a lut lo. Second half-ah pawhin inkhel kal hmang a danglam a, injury time-ah Gokulam an vannei ta zawk. Namdhari keeper Niraj Kumar-a'n hmun himah ball a hnek chhuak thei lo a, a per chu Trijoy Savio Dias-a'n a khung.

Hun pek belhah pawh minute saihna a nih tawh avangin Punjab club tan sut ngaihna a awm tawh lo a, 1-0 in Gokulam an chak. Mizo tlangval Moses Lalrinzuala telna Kerala-in IFL an khel zel dawn.