Liverpool-ah ka cham ang - Slot

Nomawi chawi nei miah loa season khar tur Liverpool fan-ten an hriat châk miah loh chanchin an hria a, an coach Arne Slot chuan Liverpool-a a cham chhunzawm zel tur thu a sawi!

Season hmang chhe tak Liverpool fan-ten Arne Slot hi thlak an duh a, an club player hlui Xabi Alonso-a'n hna a neih loh lai a nih bawk avangin Spanish coach hi la lut tura duhna thawm a ri ring hle.

Mahse, Slot chuan, "Liverpool-a ka cham leh cham loh hi keimah chauhin thutlukna ka siam chi a ni lo a, mahse, ka cham loh chhan tur erawh ka hre lo. He club-ah hian contract ka la nei a, club neitute nena kan titina aṭang pawhin ka cham ngei ka ring," a ti.

Slot hian season thar inpuahchah nana inrawnkhawmah pawh a tel zel thu sawiin, Dutch coach chuan, "Pre-season hman dan tur pawh kan hre tawh a, player thar lakluh chungchang pawh kan sawi a, heng zawng zawngah hian ka tel vek," a ti a, a chhuah loh hmel hle.

Dutch coach chuan club-in season a hman ṭhat loh chuan fan-te lungawi loh chu thil awm ve reng a nih thu a sawi a, Slot chuan, "Min sawiseltute sawisel let hi ka tih tur a ni lo a, ngaihdan kan nei thiang vek," a ti.

Reds hian zanin dar 12:30-ah Premier League match khel turin Aston Villa an lenchilh dawn a, club pahnih hian match 36 khelh tawhah point 59 ve ve an nei - season thara Champions League khel chiang turin chak an mamawh ve ve.

Reds tan hliam vanga a chawlh hnuah Mohamed Salah-a'n training a zawm leh tawh a, minute 90 inlan tur erawhin a la inpeih lo.

Ibrahima Konate-a'n training a zawm tawh a, Alisson pawh train tawh mah se, inlan tura a inpeih tawh leh tawh lohah thu chiang a la awm lo. Damlohna avanga chawl mek Florian Wirtz pawh a inlan aiin a inlan loh a rinawm zawk.