Zaninah Mumbai inlan dawn

Indian Super League chu zan hnih chawlh a nih hnuah, zanin dar 7:30 hian khelh a ni leh tawh dawn a, Mohammedan SC chuan Mumbai City an mikhual ang.

Mumbai City hian hun engemaw chen ISL table chung ber luah mah se, an league match hnuhnung paliah point hnih chiah an hlawhchhuah avangin pasarihna an ni tawh - champion tur chuan thilmak thlen a ngai tawh.

Mohammedan SC hian table mawngphah an luah mek a, he team-ah hian Joe Zoherliana, Zodingliana Tochhawng, Joseph Lalmuanawma, Jeremy Laldinpuia, Lalngaihsaka, Lalremsanga Fanai, Rochharzela leh Lalthankima te an awm.

Mumbai hi Lallianzuala Chhangte captain-na hnuaia khel niin, Hmingthanmawia Ralte (Valpuia), Lalnuntluanga Bawitlung leh Zothanpuia ten hmun pawimawh an chang vek.