Cavs hneh lotu Pistons dinhmun a derthawng

NBA Conference semifinals khelh mekah nimin zing khan, Cleveland Cavaliers chuan overtime khel a nih hnuah 117-113 in Detroit Pistons an hneh. Cavaliers hian game 5 an chak avangin seven game series-ah 3-2 in hma an hruai a, Detroit Pistons erawh tla thei dinhmunah an ding.

Little Caesars Arena, Detroit-a inkhelah Pistons-in bul an ṭan ṭha zawk a, first quarter-ah 29-27 in hma an hruai. Second quarter-ah pawh Pistons bawk an che ṭha a, Cade Cunningham inlarin point a nei zawn zat a, a ṭhiante a assist theih bawk. Cavaliers tan Cunningham a hnawk a, 60-52 in halftime an hmang.

Third quarter-ah erawh Piston an inthlahdah a, Cunningham che ṭha chhunzawm mah se Cavaliers tan James Harden a inlar a, Harden hian team-in an mamawh lai takin three points vawi tam a lut a; Max Strus, Evan Mobley leh Sam Merrill ten an thlawp ṭhat bawk avangin 84-80 in hma an hruai.

Fourth quarter-ah Pistons-in hma an sawn leh hret a, Cunningham a kut kal zelin Ausar Thompson leh Paul Reed te defence-ah an ṭangkai hle. Mahse Cavs tan Mobley leh Donovan Mitchell te an duai bik lo a, Pistons an chhanglet thei zel a, 103-103 a inkhel a tawp avangin overtime an khel.

Conference semifinals khelh meka overtime khleh hmasak berah Cavaliers an vannei zawk a, Mitchell a khelh ṭhat chhunzawm bakah Pistons player te kut a kal lo a, three points an mamawh laiin an lut thei lo a, 117-113 a inkhel tawpin Cavaliers an chak.

Cavaliers an khel ṭha a, Harden (30) leh Mitchell (21) hoin Piston an hlau lo a, regular season-a Eastern Conference hmahruaitu an ni tih a hriat loh. Pistons khel chhe lo mah se an vanduai a, third quarter-a an in thlahdah chu tuarin harsa lutuk loa chak tur angin lang hman mah se, a vanduai zawkah ṭangin point li chauhin an chak lo.

Team pahnihte hi May 16, zing dar 4:30-ah an inkhel leh dawn a, finals lut turin Cavaliers tan vawi khat chak a tawk tawh laiin, Pistons chu thih leh dam kara leng an ni tawh a, an tan chak loh a thiang tawh lo.