Chhinga Veng lakah Sihphir an vannei

Mizoram Rural Bank Pro Volleyball League-ah Nilaini zan khan, Sihphir chuan vawi hnih set an hloh hmasak hnuah an chak a, an match hmasa berah Chhinga Veng Spikers chu 24-26, 25-17, 22-25, 25-21, 15-12 (3-2) in an hneh. Zanin dar 8:00 hian Sihphirin Hunthar an hmachhawn lehnghal ang.

Sihphir an huai

Inkhel ṭan a nih aṭangin team pahnihte an inhlau lo a, point inneih chhawk zak zakin an inhnehtawk hle. Sihphir tan nikuma an inter state player Niyas Abdul Salam chuan Sihphir tan a rawn khel leh a, point 36 hmuin Kuriz Player of the match-ah thlan a ni.

A umtu zawkah ṭang mah se Sihphirin hnual loin an bei let thei zel a, set hmasa ber an hloh hnuah set thumna an hloh leh. Set hnih ve ve an lak hnu a chak tur chin felna set hnuhnungah 10-7-in an hniam zui bawk. Mahse Kerala aṭanga an lakluh Niyas hoin 13-11 in an lehpel a, Spikers-in a tawp lama an tihsual chu an chhawr tel bawk.

Pro Volleyball-a season hnih an telnaah Sihphir an danglam a, an season hmasa berah kai thar ni chungin an khel ṭha a, uiawm takin semifinal an lut pha lo. Tun ṭumah erawh coach Lalhmingliani Sailo hoin chakin bul an ṭan a, hmeichhe zinga Pro Volleyball mipa team enkawl hmasa ber leh chakpui hmasa ber a ni kawp.

Beisei pha lo Chhinga Veng

Kum khat an awl hnuah Pro Volleyball-ah Chhinga Veng an lo kir a, Cuban player Morales Ponce De Leon an lakluh avangin boruak an neih phah hle. Mahse, Mizoram volleyball inelna sang bera a inkhelh vawi khatnaah Morales a nghet lo a, a ball vuak an dansak fo bakah team tiphur turin a la ngampa tawk lo.

Spikers tan H. Malsawmsanga'n vawi 14 vaw tla mah se player-te hnuhma neih dan aṭangin Sihphir an inkhairual zawk. Chhinga Veng hi 2019 khan an champion tawh a, champion leh an tum a nih chuan an insiamṭhat nghal a ngai. Chhinga Veng hi round hnihnaah an awl a, insiamrem turin hun thawl an nei dawn.