En bik hlawh tur Elliot Anderson

Premier League-ah May 17, Pathianni zan dar 5:00 hian Manchester United-in Nottingham Forest an mikhual dawn. Michael Carrick-a hote season thara Champions League khel turin an tling tawh a, Premier League khel zel turin Forest an him tawh a, Europe khelh beiseina an neih tawh loh avangin khelh chhan tur an nei tawh lo bawk.

Inkhel result a pawimawh a, chutihrualin zanina en hlawh tur chu Forest midfielder Elliot Anderson a ni thei ang. Manchester United-in tun season-a an player pawimawh ber zinga mi Casemiro an chelh theih a rinawm tawh loh avangin Brazilian midfielder thlakna tur an zawng. Forest midfielder Anderson hi United enthlak zinga mi a ni a, chutihrualin an hmelma Manchester City lam a awn zawk.

Kum 23 mi Anderson hi Newcastle United academy aṭanga chhuak a ni a, Magpies aiin Nottingham Forest-ah hming a chher zawk. England tan pawh Anderson hi match sarih an inlan tawh a, World Cup squad-ah pawh tel ngei tura ngaih a ni.

Tun season-ah Anderson hian league match vawi 36-ah a inlan vek a, vawi khat chiah bench aṭangin a lut. Anderson hian goal li a khung a, assist vawi hnih neiin mual laiah Forest tan a pawimawh a, amah laktumtu zinga mi Man United lakah a theihna phochhuah a tum ang.