Ancelotti-a'n contract thar ziak

Brazil coach Carlo Ancelotti chuan kum 2030 thlenga Brazil enkawl turin contract thar a ziak a, an inrem anga engkim a kaltluang a nih chuan, World Cup vawi hnih chu Brazil a kaihruai dawn tihna a ni.

Italian coach hian May 2025 khan Brazil hi a zawm a, World Cup 2026 khel turin a hruai thleng. South American team hi match 10 kaihruai tawhin, vawi nga hnehna a chanpui a, vawi hnih draw neiin, vawi thum an tlawm.

Kum 66 mi coach chuan, "Brazil ka zawm tirh aṭang khan, he ram tana football hlutzia ka hrethiam nghal a ni. Brazil hi khawvela a ber a nih leh theih nan theihtawp kan chhuah a, mahse, hetah hian kei leh CBF (Brazil Football Federation) ten kan la duh tawk mai lo.

"Hna tam zawk thawh a, hlawhtlinna tam zawk chhar kan duh. Kum li dang kan thawk ho leh tur hi ka lawm takzet a, CBF-in min rinna avangin lawmthu ka sawi bawk," a ti a, Brazil a enkawl chhunzawm thei tur chu a lawm thu a sawi.

CBF president Samir Xaud chuan, "Brazil football leh CBF tan ni chhinchhiah tlak a ni," tiin Ancelotti nena contract thar an ziak thei chu a lawmawm thu a sawi a, tunah chuan World Cup lamah rilru an seng thei tawh ang.

World Cup-a vawi nga champion tawh Brazil hi kum 2002 hnu khan an la champion leh lo a, tun tournament-ah hian Group C-ah Scotland, Morocco leh Haiti te nen awm hoin, Ancelotti hoa world champion nih an tum dawn a ni.