World Cup khel lo tur Mitoma

16th May, 2026

Brighton & Hove Albion forward Karou Mitoma chuan a malpui tha a tina a, thla leh lawka khelh tur World Cup-ah a inlan thei dawn lo a, Premier League-a an match hnuhnung pahniha Leeds United leh Manchester United a hmachhawn dawn lo bawk.

Japanese forward hian May 9, Inrinni zana Wolverhampton an hneh ṭum khan a inhliam a, Brighton medical team ten World Cup hmain a dam leh an beisei loh thu an sawi. Japan hian nimin chhun khan World Cup atana an squad an puang a, Mitoma a tel lo. Brighton forward tel loin Japan-in World Cup an khelh a ngai dawn.

Mitoma hma hian Monaco forward Takumi Minamino chu, nikum December khan ACL hliam vangin an lo chân tawh a, Liverpool forward hlui bakah Mitoma a tel lo tur hi Samurai Blue (Japan) tan chânna nasa tak a tling.

Samurai Blue manager Hajime Moriyasu chuan, "Japan-in kan thil chân hi a lian tham hle a, keini bakah Mitoma hian World Cup a khel lo tur hi a pawi a ti dawn. A dam leh vat theihna turin duhsakna kan hlan a, a hma ai ṭha zawka a lo kir leh ngei kan beisei," a ti.

Hetihlai hian Arsenal defender hlui Takehiro Tomiyasu chu koh a ni leh tawh a, Tomiyasu hi June 2024 hnua a vawi khat nan Japan squad-ah a awh leh. World Cup-ah Japan hi Group F-ah an awm a, Netherlands, Sweden leh Tunisia te nen an awm ho.

Japan squad :

Goalkeepers: Tomoki Hayakawa (Kashima Antlers), Keisuke Osako (Sanfrecce Hiroshima), Zion Suzuki (Parma)

Defenders: Yuto Nagatomo (FC Tokyo), Shogo Taniguchi (Sint-Truiden), Ko Itakura (Ajax), Tsuyoshi Watanabe (Feyenoord), Takehiro Tomiyasu (Ajax), Hiroki Ito (Bayern Munich), Ayumu Seko (Le Havre AC), Yukinari Sugawara (Werder Bremen), Junosuke Suzuki (FC Copenhagen)

Midfielders: Wataru Endo (Liverpool), Junya Ito (Genk), Daichi Kamada (Crystal Palace), Koki Ogawa (NEC Nijmegen), Daizen Maeda (Celtic), Ritsu Doan (Eintracht Frankfurt), Ao Tanaka (Leeds United), Kaishu Sano (Mainz 05), Takefusa Kubo (Real Sociedad)

Forwards: Ayase Ueda (Feyenoord), Keito Nakamura (Stade de Reims), Ito Suzuki (SC Freiburg), Kento Shiode (Wolfsburg), Keisuke Goto (Sint-Truiden)