Napoli-in Hojlund lak ngheh an duh

Italian club Napoli chuan Manchester United aṭanga an hawh mek, Rasmus Hojlund chu a ngheta la turin rilru an siam fel a, nipui laiin Danish forward hi la turin thutlukna an siam.

Tun season ṭan dawn khan Napoli hian Hojlund hi an hawh a, inelna hrang hrangah match 41 khelin goal 14 a khung. Hojlund a chet chhiat loh avangin Napoli-in lak an duh a, United nen an inremnaa, pound maktaduai 38-a lak ngheh theihna chu an hmang ṭangkai thei dawn.

Kum 23 mi Hojlund hian 2023 khan pound maktaduai 76-in Man United a pan a, season hnih a cham chhungin match 95-ah goal 26 a khung hman. Old Trafford-ah beisei a phak loh avangin loan-in Napoli a pan. Danish forward hi Antonio Conte hnuaiah a tla tlum nghal a, Romelu Lukaku a inhliam bawk avangin tun season-a Napoli striker rinrawl a ni.

Napoli hian Pathianni tlai dar 4-ah Pisa an lenchilh dawn a, Conte-a naute hi pahnihna ni mah se Parukna Como nen point nga chauhin an inthlau a, match hnih khelh tur a la awm avangin Champions League khel turin an chetual a thiang lo.