Kane a hmanhmawh lo

German champion Bayern Munich chuan an striker Harry Kane chu contract thar ziahpui an tum a, mahse Kane chuan thil hmanhmawhthlakah ngai loin a la ziak duh lo niin khawthlang chanchinbuten an ziak.

Tun season-ah Kane a che ṭha a, Bundesliga-ah goal 33 khungin a team a champion pui tawh a, Champions League-ah final lut pha lo mah se goal 14 a khung a, DFB Pokal-ah final khelh an hmabak bawk. English forward hian inelna hrang hrangah goal 55 a khung tawh a, a chet ṭhat avangin Bayern chuan thlun ngheh an tum.

Bayern hian Kane hi April khan contract thar ziahpui an lo tum tawh a, mahse Kane chuan UCL-a an la dam laia thil dang ngaihtuah a duh loh avangin a tikhawtlai.

UCL aṭanga a tlak hnuah Bavarians hotuten an bawhzui leh nghal a, Kane hian Allianz Arena-ah cham hreh lo mah se contract thar ziah chungchangah a hmanhmawh loh thu a hrilh a, World Cup atan insawrbing a duh.

Kum 32 mi Kane hi kum naupang tak ni tawh lo mah se, a chet ṭhat avangin club lian dangin lakluh an duh a, an zingah Barcelona chu an langsar hle a, Barca president inthlanah pawh campaign nan Kane an hmang hial.

Hetihlai hian Kane hi Premier League lamah a let leh dawn nia sawi a awm bawk a, amah Kane berin Bayern-ah cham a hreh loh thu sawi mah se, thuthang a tam avangin Bayern hotute tan ngaihṭha taka awm a harsa ang.

Naktuk zan dar 7-ah Bayern hian Cologne an mikhual dawn a, tun season-a league match hnuhnung ber tur a ni tawh. Champion tawh mah se Bayern-in chak loh an duh lo a, player pawimawh an luhtir hreh loh avangin Kane pawh a khelh ngei a rinawm.