Republic Veng tuipui fawn

RG Stadium-ah mipui ṭhahnem tak an pung khawm fo a, tun ṭum MBOCWWB 8th Inter Village Football Tournament 2026 final-ah pawh mipui pung khawm an ṭhahnem.

A sawi uar deuh chuan tualchhung inelnaa mipui punkhawm ṭhahnem ber ṭumin an sawi a, chutihrualin CYMA Final 2025-a Republic Veng leh Bethlehem Vengthlang inkhel entu nen erawh khai khin theih tak tur a ni.

Republic Vengin football an thiam a, an tui chilh a, RG Stadium a hnaih bawk avangin inkhel entu tam zawkin kawr sen a ha hial. Stadium-ah Republic Veng tih inziak banner lianpui an tar. Flag sen leh khuang lian nen an thawk chhuak a, inelna an tih hlut phah hle.

Hei chauh hi a ni lo a, Republic Veng ṭantuten awmze neiin an au rual thei a, mipui hui khawmtu ṭha tak an neih vang a ni thei ang. A ropui lai erawh hmuhnawm khawpin Mexican Wave a siam thei a, a Mizo ṭawng chuan 'Republic Veng tuipui fawn' tiin a vuah thei ang.

Republic Vengin an beisei ang result nei lo a, referee thutuknaah thinur mah se buaina an siam lo. Veng/khua inelna awm lehzel tur atan entawn tur ṭha tak an hnutchhiah.