Dan rual loh Spurs an tlang

NBA Conference semifinals-ah San Antonio Spurs chuan Inrinni zing khan, Minnesota Timberwolves chu 109-139 in an hneh a, seven game series-ah 4-2 a chakin Conference finals-an lut a, Oklahoma City Thunder nen an inhmachhawn dawn.

Target Center, Minnesota-a inkhelah Victor Wembanyama hoin Spurs an nung nghal a, Wemby bakah hian Stephon Castle leh De'Aaron Fox te an khel ṭha a, first quarter-ah 36-27 a hmahruaiin an kut a kal nghal hle.

Second quarter-ah Wolves-in hma an sawn hret a, an thiampuipa Anthony Edwards-a hoin point score lamah ṭan lain point 34 an score tling. Mahse Spurs an inthlahdah duh bik lo a, point 38 an score ve tho avangin 74-61 in chawlhlawk an hmang

Third quarter-ah pawh Spurs an che ṭha chhunzawm zel a, Wolves erawh an inthlahdah bakah Spurs defence khawng tak chu an tawn tlang zo lo a, third quarter-ah point 23 chiah an score. Spurs erawh point score lamah harsatna an tawk lo a, 108-84 in hma an hruai chhunzawm zel.

Fourth quarter-ah laihawlah chuan chak tur a chiang tawh a, Spurs-in an player rinrawlte an la chhuak hial. Theihtawp chhuahin Wolves-in bei let mah se a vanduai zawkah an ṭang a, final an inhlangkai zo lo.

Spurs hi chak tura rinkai zawk ni mah se, game hmasa lamah uiawm taka chak loh an nei a, game 4-ah Wemby hnawhchhuah a nih bawk avangin game hnih an chak lo a, Wolves-in final lut turin beiseina an nei sang hman hle. Mahse Spurs an tlu rei lo a, game 5 leh 6-ah chiang taka chakin final an lut. Spurs hian May 19, Thawhlehni zingah Thunder nen final an khel leh nghal ang.

Dan pangngaiin Wemby a che ṭha lehpek a, defence leh offence-ah team tan a ṭangkai hle. Spurs player 15 inkhelah zingah Keldon Johnson chiahin point a nei lo a, player tinin final an luh theih nan an thawh hlawk takzet.

Hetihlai hian Wolves hi khel chhia tia sawi tur an ni bik lo a, Edwards (24), Terrence Shannon Jr. (21) leh Naz Reih (18) ten theih tawp chhuah mah se an ṭhiante puihna an dawng ṭha tawk lo a, final an luh loh chhanah a ngaih theih. An center Rudy Gobert phei chuan point a neih loh bakah rebound vawi thum chiah a la a, Gobert hian a hnampui Wemby a ngam lo hle.

Inkhel dangah Detroit Pistons chuan 115-94 in Cleveland Cavaliers chu Inrinni zing vek khan an hneh a, series-ah 4-4 in an inhnehtawk chiah. Pistons leh Cavaliers hian tukin zing dar 5:30 khan semifinal game hnuhnung ber an khel a, an result kan hre hman lo.