TNT lakah Tuichangral an insiamṭha

Mizoram Rural Bank Pro Volleyball League 2026 chu khelh mekah Inrinni zan khan, Tuichangral chuan 25-21, 25-19, 25-18 (3-0) in Thutak Nunpuitu Team (TNT) an hneh a, Tuichangral hian an match hmasa berah Khawbel hneh lo mah se, an match hnihnaah an insiamṭha nghal.

Zanin dar 8:00 hian LPS Arena, Falkland-ah PVL chhunzawm a ni leh nghal dawn a, Khawbel leh Hunthar te an inhmachhawn ang. Inkhel en man hi Rs.50 a ni a, LPS Youtube (member only) aṭangin a en theih bawk.

Mahela a harh

An khelh hmasak berah set thum set hnihin Khawbel lakah Tuichangral an tlawm a, TNT lakah erawh team pumpuiin hma an sawn. Set hmasa ber atangin inkhel an thunun tluan a, Sri Lanka atanga an lak luh Mahela Indeeewar chuan lehlam ban pharna chung atangin a vaw tla fo a, point 28 hmuin vawi nga chiah a tisual.

Khawbel hmaah a vawi khat nan Mizoram leilungah Mahela a inkhel a, a ngampa tawk lo a, vuak sual a ngah avangin team avanginna team a tiphur zo lo. TNT lakah Mahela a danglam a, coach David Aizampuia Fanai chuan a awmna hmun thlakin a khelh thiamna ding lam sir atangin ball a vua a, a zuan sanna chhawr telin TNT-in an dang thei meuh lo.

Team pahnih inkara danglamna siamtu lian ber niin, Kuriz Player of the Match-a thlan a ni bawk. Tuichangral hian set thum la tlang nghalin hnehna an chang a, Mizoram Rural Bank Pro Volleyball League kal mekah set hloh lo a chak hmasa ber an ni.

Tuichangralin hma an sawnna pawimawh tak chu player ten point an hloh tlem a, Mahela thlawptu ber Saidingpuia Sailo chuan a khelh hmasak aiin tihsual a nei tlem zawk a, ṭum 17 vaw tlain point hnih chiah a paih a, lehlam hlap dangtu pawimawh Amos Vanlalpeka'n hloh nei lovin point riat a hmu bawk. Chiai tur khawpa TNT-in an nawr let zawh loh avangin nuam ti takin an khel tluan a, an match dawt leh atan inrintawkna an ngah sawt ang.

TNT an chuai

Anastasia Electric Veng laka tlawm tawh, Mizo hlanga khel TNT-in an elpui team dang khing thei tur player hriam leh rin ngam an tlachham tih a lang chiang lehzual a. Nung takin inkhel bul ṭan mah se an daih rei lo a, set khatna tirah 7-4-in an sang a, an inkhelh chhunga an tawn san lai ber a ni.

TNT-in ball an pek hnem ber C. Lalhriatpuia'n vawi 13 vaw tlain point riat a hloh a, Rohluzuala'n tum 10 hlap tlain mi malin hmasawn mah se an elpui team dang player rinrawlte nena khaikhinin an hnuhma a inlen hleih. An inkhel rei tial tial a, an inkar a zau hret hret a, inelna sanga rin ngam ball vaw tlatu leh lehlam hlap dang thei tur an tlachham.

Kum 2023 champion Muanna Veng team hi season liam taa an player langsarten an chhuahsan deuh vek a, an hmun ruak luah zo an kawl rih loh avangin harsatna an tawk. Match hnih an tlawm zawn rualin an hmabak a hautak hle dawn a, semifinal an beiseina tinung turin May 20-ah Chhinga Veng Spikers an hneh ngei ngei a ngai dawn. May 19-ah Tuichangralin hmasawnna nghet leh rin tlak an nei em tih fiah nan league kal meka khelh hnih chak zawn lai Anastasia an hmachhawn ve thung ang.