NE Elite Basketball League: Tlai dar 4:00-ah U19 trial nei dawn

India-a basketball tihmasawntu zinga pakhat, ABC Basketball Development League Pvt Limited, ACG leh Mizoram Basketball Association te ṭangkawpin NE Elite Under 19 Basketball League an buatsaih dawn. Inelna tel tur zawnna 'trial' chu vawiin tlai dar 4:00 hian Hawla Indoor Stadium-ah neih a ni ang.

League hi June 22, Thawhṭanni aṭanga khelh tura ruahman a ni a, he league atan hian Northeast state danga an hruaituten player ṭha 10 ṭheuh an thlang chhuak dawn a, chung player-te chuan Aizawlah trial an nei leh dawn. Trial-a an khelh dan azirin point pek leh tur niin, draft hmangin team hrang hrangten an player duh an thlang leh dawn. Hei hi team tinte inrualkhai taka an khelh theih nana duan a ni.

Trial hi Mizoram Basketball Association selection committee bakah, FIBA-a Arnika Gujar-Patil certified FIBA facilitator, leh coach ni bawk ten an endik dawn a, May 20, Nilaini zanah Dawrpui Multipurpose Hall-ah draft selection neih a ni leh dawn bawk.

Inelnaa tel tur hian Aizawla baksteball ngaina veng 10 - Chanmari, Zarkawt, Dawrpui, Chawnpui, Bungkawn, Zemabawk, Nursery, Tuikual South, Saron leh Chaltlang te chu thlan chhuah an ni a, rokhawlhna a awm avangin Zemabawk an inhnukdawk a, an aiah Khatla South thlan an ni. Veng tin hian an veng chhung mi ngei player pali ṭheuh an neih a ngai dawn a, NorthEast state dang aṭanga player an rawn tirhte chu draft selection hmangin, pariat an la leh dawn bawk.

Under 19 league hi ni 10 chhunga zawh hman tura ruahman a ni a, League khelh a nih chhung zawng hian scout an awm dawn a, scout ten inelnaa che ṭha an tih player panga te chu High Performance Centre, Bengaluru-a inzir chhunzawm turin an thlan chhuah an ni dawn a, an zinna leh zirna senso zawng zawng tumsak an ni dawn bawk.

Coach atan MBBA hnuaia tier 1 leh 2 aṭangin a ṭha zual thlan chhuah tur an ni a, referee te pawh tualchhung referee te hman tur niin, player te bak state pawn mi hman an ni dawn lo. ABC leh AGC te hian MBBA nen kum nga daih contract an ziak a, kum nga chhung hian inelna hi Aizawlah kum tin an buatsaih dawn. Kum lo la awm zel turah hmeichhe inelna pawh buatsaih an tum bawk.