Old Traford-ah Casemiro an thlah

Brazilian midfielder Casemiro-a'n tun season tawpah Manchester United a chhuahsan dawn a, Old Trafford-a player anga a inlan hnuhnung berah Manchester United ṭantute 'standing ovation' nen an thlah.

Hun tawp hma minute kua a la awmin Casemiro hi Mason Mount-a'n a rawn thlak a, Brazilian midfielder hian a ṭhiante chibai kualin, khelmual a chhuahsan lai hian mipuiin zahna chibai bukin ding chungin kut an lo beng.

United manager Carrick chuan, "Casemiro hi player ṭha tak a ni a, kan club tan hna ṭha tak a thawk a, ka tan phei chuan duhthusam a ni. Mahse, football-ah chuan tawp hun a awm a, tun hma pawhin player ropui tak takten club an lo chhuahsan tawh. A hmun ruak hnawh khat hi kan tan chona a ni a, chutihrualin a hnathawh avangin a chungah kan lawm takzet," tiin a sawi.