Fernandes-a'n assist record nih rual

Manchester United captain Bruno Fernandes-a'n Arsenal legend Thierry Henry record vawi 20 (2002/03 season) a nihrual a, 2019/20 season khan Manchester City midfielder Kevin de Bruyne pawhin assist vawi 20 a nei tawh bawk.

Kum 31 mi Fernandes hian ball fing a pe chhuak tam a, Nottingham Forest lakah pawh tlarhma hriam deuh se chuan record a siam thei ang. Mahse, Bryan Mbeumo bakah Amad Diallo leh Joshua Zirkzee te goal hmaah an bil.

Tun season-ah Fernandes hian bul a ṭan ṭha tawk lo a, Ruben Amorim-a'n 5-2-3 formation a hmang a, tlarhnung aṭanga ball semtu atana hman a nih avangin match riatnaah assist hmasa ber a nei chauh a, chutihrualin Portuguese manager hnuaiah match 17 aṭangin assist vawi sarih a nei hman.

Michael Carrick hnuaiah Fernandes hian no. 10 hna a chelh a, English manager hnuaiah Portuguese midfielder theihna tak a lang chhuak a, assist vawi 13 a nei tawhin tun season Premier League-ah assist vawi 20 a nei tawh.

Man United captain Fernandes chuan, "Assist vawi 19 ka neih kha chuan rilruah assist record a awm ṭan a, chutihrualin tun hmain vawi 19 ka neih tlin ngai loh avangin hetah pawh hian ka lungawi tawh ang. Tuna player ropui Thierry leh Kevin te ka nihrual hi ka lawm hle. Ka teammate pawhin ka dinhmun min hriatpui a, record ka siam theih nan nasa takin min pui a ni," tiin a sawi.