Mizo tamna Diamond Harbour an champion

Indian Football League-ah Diamond Harbour chuan injury time-a Hugo Diaz-a goal hmangin Dempo SC nen 1-1 in an inhnehtawk a, point khat hlu tak an hlawhchhuah avangin an hnuaia awm Shillong Lajong-in an umpha thei tawh lo. IFL hmasa berah Kolkata club an champion a, season tharah Indian Super League an khel ang.

IFL champion Diamond Harbour-ah hian Mizo paruk Lalliansanga Renthlei (Lunglei Venghlun), Paul Ramfangzauva (Kolasib), R. Ramdinthara (Champhai Kanan), Samuel Lalmuanpuia (Zemabawk North), Sairuatkima (Dawrpui Vengthar) leh Lalremruata (Khawruhlian) te an tel a ni.

Point khat chauh

Diamond Harbour-in season bul an ṭan ṭhat avangin Dempo SC an hmachhawn ṭum hian champion turin point khat chiah an mamawh tawh a, bul ṭantu zingah Paul Ramfangzauva a tel a, bench aṭangin Liansanga leh Tharpuia te an lut bawk.

Kolkata club-in inkhelh ṭantirh lamah beisei an pha lo a, tihsual an ngah. Goan club lamin DHFC defender tihsual vangin chance ṭha an nei a, Sebastián Gutiérrez-a'n hun ṭha a hlah thung.

Pressure nei lo Dempo an nung ṭha a, first half-ah chungnung zawk mah se goal an khung bik lo. Second half-ah Dempo-in goal an khung a, Marcus Joseph-a freekick petin wall per mah se a per let chu Joseph hian kawh zetin minute 50-naah a pet lut.

Kibu Vicuna-a'n chak duhin bench aṭangin Luka Majcen, Bryce Miranda leh R. Ramdinthara te a luhtir a, goal hmuh tur erawh a awm mai lo. Injury time minute 10 pek a ni a, substitute Girik Khosla cross ṭha zet chu Spanish forward Hugo Díaz-a'n tauh lutin 1-1 in inkhel a tawp. Point khat hi Diamond Harbour champion nan a tawk.

Nomawi an chawi ta

Season liam ta khan Churchill Brothers chu I League champion-a puan hman an ni a, hetah hian Mizo tlangval pathum Liansanga, Remruata leh Lalbiaknia te an tel. Goan club hi AIFF-in champion-ah puang hman mah se CAS-in Inter Kashi chu champion-ah a puang ta zawk.

Lunglei tlangval Liansanga leh Khawhruhlian tlangval Remruata te hian Diamond Harbour an zawm a, an phu ang ngeiin Indian Football League nomawi an chawi ta.

Diamond Harbour tan hun chhinchhiahtlak a ni a, coach Kibu Vicuna hlutna a san belh sawt bawk. Spanish manager hian I League-ah Mohun Bagan a champion pui tawh a, Diamond Harbour hi I League 3, I League leh Indian Football League-ah a champion pui vek.