Medal 19 latu Mizoram Taekwondo

Meghalaya Open National Taekwondo Championship vawi hnihna chu neih zawh a ni ta a, he inelna hmachhawn tura kal Mizoram team chuan medal 19 la chungin inelna an mangṭha.

May 15-17 inkara Shillong khawpuia neih inelnaah hian Mizoram hian gold 13 lain, silver leh bronze hi pathum ve ve an la bawk.

Mizoram team hian Kyorugi (fight) inelna huangah gold pasarih, silver pathum leh bronze pahnih an la a, poomsae inelnaah gold panga, silver leh bronze pakhat ve ve an la.

Poomsae freestyle inelnaa gold hlawhchhuaktu Mizoram team-te hian championship-a khuallian, Meghalaya speaker Thomas A.Sangma leh sports minister Wailadmiki Shylla te hmaah freestyle poomsae an en tir a, an chet ṭhat avangin a bik taka lawmpuina hlan an ni hial a ni.

Mizoram Team hi Armed Veng South tlangval Lalinpuia, Venghnuai tlangval Vanlalmawipuia leh Hlimen nula Lianthangpuii te bakah Master Joseph Thansanga leh Master VL Sawma ten an hruai a, result ṭha tak nen an lo haw.