A tawpah Cavaliers an dingchang

NBA Conferenc semifinals khelh zawh a ni ta a, nimin zing khan Cleveland Cavaliers chuan 125-94 in Detroit Pistons an hneh a, seven game series-ah 4-3 a chakin finals an lut.

Little Caesars Arena, Detroit-a inkhelah Cavaliers an nung nghal a, bul ṭan ṭha zawk niin, first quarter-ah 31-22 in hma an hruai nghal. Second quarter-ah pawh Cavaliers bawk a chungnung zawkah an ṭang a, Donovan Mitchell-a hoin an khel ṭha tlang a, 63-47 in halftime an hmang.

Third quarter-ah Cavaliers an khel ṭha lehzual a, Mitchell bakah Jarrett Allen, James Harden leh Evan Mobley te an rawn harh thar a, Mitchell kut a kal chhunzawm zel bawk avangin 98-73 in third quarter an khar a, point 27 laiin an inthlau hman hial.

Fourth quarter-ah Pistons-in theihtawp chhuah mah se, an inthlauhna a tam hret tawh a, inlehthal nan hun a awm tawh lo. Cavaliers erawh an inthlahdah duh lo a, player tinte an khel ṭha em em vek a, quarter tinah point 30 score tling vekin, a chungnung zawkah an ṭang tluan zak a, harsa lutuk loin hnehna an chang.

Pistons hi regular season-ah Eastern Conference hmahruaitu an ni a, Cade Cunningham hoa an chet ṭhat avangin champion tura rinkai zinga mi an ni. Cavs erawh regular season-ah palina an ni pha ṭawk a, mahse Pistons lakah an zam bik lo. Game 1 leh 2-ah Pistons hneh lo mah se huaisen takin an bei let a, rinkai zawk ni lo mah se final an inhlangkai.

Cavs hian May 20, Nilaini zing dar 5:30-ah finals game 1 an khel leh nghal dawn a, New York Knicks nen an inhmachhawn dawn. Knicks hi regular season-ah pathumna an ni a, Cavs hian an chung chiaha season khartu hi an hlauh dawn bik loh avangin inkhel hmuhnawm a beisei ngam.