India aiawhin Zaii inlan dawn

Asian Taekwondo Kyorugi Championship, 9th Asian Poomsae Taekwondo Championship leh 11th Asian Para Taekwondo Championship neih tura India aiawh turin Ruthi Zainunsiami chu thlan a ni a, poomsae inelna bikah India tan hian a inlan ang.

Nimin aṭanga Ulaanbaatar, Mongolia-a neih ṭan inelna hi May, 25, Thawhṭanni thleng awh tur a ni a, India team hi group hnih, kyorugi (fight) leh poomsae-ah inṭhenin, Zaii telna poomsae team hian nimin khan Mongolia hi an pan ve chiah - vawiinah Zaii hi a inlan nghal dawn.

Ramhlun Sporting Club aṭanga inzir chhuak Zaii hian India ram aiawh tur hian selection stage hrang hrang hmachhawnin, March 29 khan Bangalore-ah final selection hmachhawnin a tling - Under-50kg mixed pair-ah inelna hi a hmachhawn dawn a ni.

Ramhlun Venglai nula Zaii hian Mizoram aiawh pawhin inelna a lo hmachhawn fo tawh a, gold medal paruk, silver medal pali leh bronze medal panga a lo hlawh chhuak tawh. Kum 2023 khan Poomsae World championship-ah India aiawhin Hong Kong-ah a lo inlan tawh bawk a, mahse, quarterfinal-ah uiawm takin Brazil lam mi a ngam lo.