Pedro tan hmun a awm lo maw?

Chelsea-in an player of the season atan nipui transfer-a an lakluh João Pedro an thlang a, mahse, Chelsea forward hi Carlo Ancelotti-a World Cup squad-ah a tel phak lo.

Pedro hian July 2025 khan pound maktaduai 60 thlenga a man sang chho thei turin, Chelsea hi Brighton & Hove Albion aṭangin a zawm a, Blues tan inelna hrang hrangah match 49 khela goal 20 khungin, assist vawi kua a nei.

Mahse, Ancelotti hmin nan a tawk zo lo a, World Cup-ah ram tan a feh chhuak ve dawn lo. King Carlo chuan, "European football danglam bikzia an sawi ṭhin hi ka pawm thlap.

"Mahse, chu chauh chu kan thlir thei lo a, thil tam tak ngaihtuah tel a ni. Joao Pedro pawh hian season duhawm tak a hmang a, Brazil squad-a awm ve hi a phu hle. Mahse, uluk taka kan ngaihtuah hnuah, amah zah tak chungin kan telh thei ta lo a ni.

"Pedro ka uipui em em a, chutiang bawkin player dang koh inbeisei, tel ve ta lote pawh pawi ka ti hle," a ti a, awlsam taka thutlukna an siam bik loh thu a sawi.

Hetihlai hian Champions League khel tura Real Betis hruai kaitu Antony pawhin season duhawm tak hmang mah se, Brazil squad-a tel nan a tawk zo lo - Manchester United forward hlui hian tun season-ah match 45 khelin goal 14 a khung a, assist vawi 10 a nei tel.

Kum 41 mi Thiago Silva-a'n a tawp nan World Cup khelh beisei mah se, Porto centre back tan Primeira Liga nomawi chawi pawh Ancelotti rilru hmin nan a tling tawk lo.

Brazil hi World Cup-ah hian group C-ah awmin, Morocco, Haiti leh Scotland te nen an awm ho a, harsatna lian tham tawk loa group stage hi chu paltlang mai tura ngaih an ni.