Inter Milan-ah Martinez a hlim

Inter Milan forward Lautaro Martinez chuan a khelh mekna, Inter-in chhuak tura an tih hma chu a khelh zel tur thu a sawi a, Milan club-ah a cham a tum. Amah thlithlaitu Barcelona tan thu hriat nuam a ni lo ang.

Barca-in tun nipuia chhuak tur Robert Lewandowski thlakna tur an zawng mek a, Lewy aiawh thei tur zinga an sawi rik pakhat chu Martinez hi a ni. Barca-in Martinez an duh hi thil thar a ni lo a, Argentina internationalhi hun eng emaw lai aṭang khan an lo ngaihven tawh a, an duhna pawh an lo lantir tawh.

Martinez hian tun hnaiah interview thar a nei a, Barca-a insawn tur anga sawi chu thil thleng lo tur angin a lantir. He striker hian Inter-ah a hlim tawk tih sawiin, Milan khawlaiah hian a career hman zawh a duh thu a sawi.

Kum 28 mi Martinez chuan, "A theih chuan Inter-ah ka career hman zawh ka duh. Kei leh ka chhungte hi helai hmunah hian kan hlim a, restaurant te pawh kan nei a, naupangte pawh school kalin ṭhiante pawh an nei ve tawh. Chuvangin hmun danga awm tura ngaihtuah ringawt pawh ka tan chuan a har tawh.

Football-ah chuan thil thleng tur hriat a ni ngai lo, mahse chhuak tura min ti te a nih ngawt loh chuan, he hmunah hian ka awm reng ang," a ti a, Inter-ah cham a tum ruh hle.

Tun season-ah Martinez hi hliamin a tlakbuak a, chuti chung chuan inelna hrang hrangah goal 22 a khung tho a, Serie A bikah goal 17 khungin ani aia khung hnem an awm lo. Thla leh lawka khelh tur World Cup-ah pawh a dam ṭha a nih chuan, Argentina tlarhma tihriamtu tur a ni.