Canadian Grand Prix atan inbuatsaih nasa

Formula 1 kal mekah Candian Grand Prix neih a hun leh dawn tawh a, May 23, Inrinni chawhma dar 9:30-ah sprint weekend an hmang leh dawn, team leh driver-ten an car siamremna hun an nei tlem sawt dawn.

Canadian GP atan driver hrang hrangte an phur tawh a, table hmahruaitu Kimi Antonelli chuan, " kan car hi ka ringtawk a, kan chet ṭhat chhoh lai a nih avangin ka phur tawh hle. Team dang pawhin hmsawn tumin ṭan an la nasa a, race hmasa pathumah khan thil a inthlak danglam hneh hle tih kan hmu tawh. Chuvang chuan hmahruaitu nihna chelh reng thei turin kan inbuatsaih reng a ngai a ni," a ti.

Lando Norris pawhin hma an sawn avang ringawta, ngaihṭha taka awm thei an nih loh thu a sawi ve bawk a, McLaren driver chuan, "Miami kha chu kan team tan track hman thiam tak a ni a, Mercedes erawh chuan kum dangah khan harsa an ti thei hle. Chutichung chuan an la tlan chak em em tho a, hei hian team dan an ṭan zia a tilang. Chuvang chuan ngaihṭha taka awm hman kan ni lo a, theihtawp kan chhuah ve reng a ṭul," a ti.

Hetihlai hian Max Verstappen erawh chuan, "I thlir phawt mai ang u. Miami nen khaikhinin track dang hlak a ni a, chuvang chuan eng tiang khawpa inelna ṭha nge kan neih pui theih dawn thlir phawt mai ang," a ti a, Montreal-a thil thleng tur a beisei chungchangah Dutch driver chu a ṭawng huai lo hle.

Miami GP-ah khan team hrang hrangin an car nasa takin an siamṭha a, chung zingah chuan McLaren, Ferrari leh Red Bull-te pawh an tel. Team pathumte hian hma an sawn hle. Mercedes-in Canada-ah an car upgade thar ken an tum hmel a, Miami-ah kha chuan a thlakna tur zinga tlem te chauh an la hmang.

Hetihlai hian team dang pawhin an car an upgrade nasa a, an zingah McLaren chu a langsar zinga mi an ni. McLaren pawh hian a thil neih tharte chu Circuit Gilles Villeneuve, Montreal-ah hman an tum bawk.