Thunder tan Wemby a sang hret

NBA Conference Finals Game 1 chu nimin zing khan khelh ṭan a ni a, Western Conference Finals-ah San Antonio Spurs chuan overtime-ah 122-115 in champion lai Oklahoma City Thunder an hneh a, Victor Wembanyama chuan point 41 neiin rebound vawi 24 zet a la a, game 1 a Spurs a chakpui.

Inkhel hmuhnawm chu

Paycom Center, Oklahoma-a inkhelah Spurs-in bul an ṭan ṭha zawk a, first quarter-ah Thunder tan Alex Caruso a khel ṭha a, Caruso hian amah aia sang Wemby a ven ṭha a, Wemby a chet hleihtheih loh avangin 27-27 in first quarter a tawp.

Wemby dan reng theih a ni lo a, second quarter-ah inlar ṭanin point a nei ṭan a, a hma a sawnpui. Spurs hian an hmahruaina tizau hman mah se Caruso a inthlahdah bik lo a, Chet Holmgren nen team-in an mamawh lai taka three points an luh theih avangin, an hnufual lutuk tur chu an chhanhim a, 51-44 in chawlhlawk an hmang.

Halftime chawlh OKC-in an hmang ṭha tih a hriat a, third quarter-ah hmasawnin an kut a kal sawt. MVP-a thlan zawh hlim Shai Gilgeous-Alexander leh Jalen Williams hoin an inthlauhna an tihniam an tum. Spurs player Devin Vassell leh Keldon Johnson te nen three point hmangin an inchhang tawn zak zak a, 80-73 in Spurs-in hma an hruai chhunzawm.

Caruso a ṭha

Fourth quarter-ah OKC an ṭha lehzual a, Caruso bawk chu an hmachhuan a ni. A defence ṭhat vanga hriat hlawh Caruso hi point score lamah pawh a duai lo tih a lantir a, Wemby lakah attempt a nei ngam a, Thunder player-te tiphurtu ber a ni. Spurs tan hun tawp dawnah Wemby-a'n vawm chhoh chu, Holmgren-a'n a block avangin 101-101 a ni a, hun pangngaiah chak zawk an awm lo.

Overtime-ah Spurs-in Vassell leh Wemby hmangin te hmangin hma an hruai leh nghal a, mahse Thunder-in awlsam taka tlawm tir mai an tum bik lo. Caruso three points, Williams leh SGA hmangin hma an hruai let daih. Wemby-a 'deep three' hmangin Spurs-in an nihrual a, OKC fans-in chak tura an inrin hman avangin stadium chhung a a reh ṭhup. 108-108 a nih avangin overtime 2 an khelh leh a ngai.

Vawi hnih nana overtime an khelhah pawh, team pahnihten point an inneih chhawk zak zak a, mahse Wemby a inlar a, paint area-ah Thunder player ten an ngam lo hle a, defence-ah a thawh hlawk bawk avangin inkhel hmuhnawm takah a team chu a chakpui.

Wemby tan record

Inkhelh tawpah Wemby a langsar ber a, kum 22 leh ni 134-a upa niin NBA playoff match china point 40 leh rebound vawi 20 la tling thei naupang ber a ni.

Kareem Abdul-Jabbar chuan 1970 finals-ah, kum 22 leh ni 343-a upa niin point 40 score-in rebound vawi 20 a lo la tawh a, kum 55 zet record lo ding tawh chu Wemby hian a khum.

French player Wemby hi Spurs innghahna ber a ni a, inkhel ṭantir lamah beisei pha lo deuh mah se, boruak sangah a pawimawhzia leh a thiamzia a lantir. Tun season-ah Spurs-in champion an tum a nih chuan a inthlahdah emaw a chet chhiat chuan a pawi thui dawn.

Thunder ri a zawi

Khel chhia tia sawi rem lo mah se Thunder-in game hmasa beisei an phak lo a, semifinals-a LeBron James-a telna Los Angeles Lakers hnehtu hian champion nawn an duh a nih chuan an game 2 aṭangin hma an sawn a ngai.

Thunder tan Caruso a langsar ber a, kum 32 mi Caruso hi feet ruk leh inches ngaa sang ni mah se, feet sarih leh inches lia sang Wemby a veng a, Wemby tan point score-na awlsam a pe duh lo.

Caruso hian point 31 neiin a career-a a score hnem ber ṭum a ni a, ani bakah hian SGA (24) leh Jalen Williams (26) te khel chhe lo mah se anni bak hi point 10 score tling thei an awm lo a, an insiamṭha dawn a nih chuan player dang chet ṭhat bakah a che ṭha sate inthladah a thiang dawn lo.