A tawp thlenga beitu Chanmari tan point khat

Indian Football League-ah Chanmari FC chuan an match hnuhnung berah Rajasthan United an hmachhawn a, 2-0 in hnufual mah se a tawp thlenga an beih avangin injury time-ah goal hnih an khung a, 2-2 a inhnehtawkin point khat hlu tak an hlawh chhuak. Dipankur Sharma hote hian match 14 aṭangin point 15 an hmu a, IFL an khelh hmasa berah Chanmari hian relegation playoff an pumpelh bawk avangin an bul ṭan dan a ṭha thawkhat hle.

Rajasthan United khelmualah floodlight a awm lo a, AIFF lamin tlai lama inkhelh pha loin zan dar 6:30-ah chauh inkhelh a phal avangin RUFC hian an mualah Chanmari FC an mikhual thei lo a, Kolkata-ah inkhelh a ṭul phah. Mizo club-in bul an ṭan ṭha a, Jota-a'n chance ṭha bik neiin Brazilian forward hian goalkeeper chauh a hmachhawn hnuah a pet over.

Team pahnihin chance an inneih chhawk a, Aron Vanlalrinchhana pawhin box pawn aṭangin goal zawnah a pet thei lo. Minute 25-naah Gerard Aritgas-a'n a hun ṭha neih a bawhpelh lo a, Zothanmawia goal line a pelh thui bawk avangin Rajasthan forward tan goal khung a harsa lo.

Minute 45-naah midfielder Kiatalua Tadeu Emous-a'n through ball ṭha pe lutin Rajasthan winger Thomyo Shimray-a'n keeper T. Mawia bumin goal a khung. First half-ah vek Jota leh Lalpekhlua te hmangin Chanmariin sut thei mah se an chance neih an khung thei lo ve ve.

Chanmariin second half-ah chance insiam hnem mah se goal hmaah an vanduai. Lalruatsanga khung tur pawh goal line aṭangin Rajasthan defender-in a dang. Minute 90 chhungin Chanmari khung thei lo mah se injury time-ah Serchhip tlangval Ruatsanga'n mawi zetin a tauh lut. Mizo club-in an nawr chhunzawm a, Tlangmawi tlangval Michael Lalbiaksanga'n box pawn aṭanga petin Rajasthan goalkeeper Dinesh Choudhary chesualin a kap karah a lut. Mizo club-in injury time-ah goal hnih an khung a, 2-2 in inkhel a tawp.