Chelsea an chak; tla thei dinhmuna la ding Spurs

West Ham-in 3-1 ngawta Newcastle United an ngam loh khan, Premier League khel chhunzawm turin Tottenham Hotspur-in hun ṭha an nei a, mahse, an hun ṭha neih an bawhpelh leh ta.

Thawhlehni zan khan Spurs hian Chelsea chu khualmualah 2-1 in an ngam lo a, season thara Premier League khelh chhunzawm zel turin an match tawp bera Everton an hmachhawn hunah point hlawhchhuah ngei ngei an mamawh dawn.

Coach atana Xabi Alonso an lakluh tur thu an hriat hnua phur thar Chelsea hian Enzo Fernandez leh Andrey Santos hmangin goal an khung a, 2-0 in hma an hruai.

Spurs hian Richarlison hmangin si phurh sut ṭhen mah se, goal an khung a tlai hret tawh a, point an hlawh chhuak zo ta lo - an hmelma Arsenal-in champion an lawm laiin, EPL khelh phak leh phak lohah an buai mek!

Hello Chelsea

Blues-in coach atana Xabi Alonso an lakluh dawn avangin an phur thar a, coach lailawk Calum McFarlane ngei pawhin Spanish coach avanga an player-te thlenga an phur thu a sawi.

London club hian an phurna chu khelmualah an lantir zui a, minute 18-naah Chelsea player pawimawh Enzo Fernandez chuan Spurs goalkeeper Antonin Kinsky tana man rual loha ṭhain, box pawn aṭangin goal hmahruai a khung.

Team pahnihin goal dang an khung lawk lo. Chawlhlawk hman hnuah Chelsea an inlar leh a, minute 67-naah Andrey Santos chuan Enzo siamsak chu hnai takah goal-ah a chantir a, 2-0 a ni.

Blues tan tun season-a form lo tak Cole Palmer-a'n chance nei mah se, Kinsky-a'n ṭha zetin a dansak a, Enzo pawhin freekick aṭanga khung belhna hun a neih chu bar tihper nan a hmang.

Spurs beiseina

Tottenham-in inkhel ṭantir lamah hmahruaina chance an nei a, mahse, Mathys Tel chuan uiawm takin post a tihper - hemi hnuah hi chuan Spurs hi 'tlak hlau' khelhin an khel lo a ni ber!

Minute 74-naah erawh Spurs hian an khung ve hram a, World Cup khel tura Brazil squad-a koh loh Richarlison chuan si phurh sut ṭhenna goal a khung. Mahse, Spurs hahrhchhuah a tlai hret a, 2-1 in an tlawm.

Tottenham hian hun tawp hnaih lamah penalty an beisei a, mahse, pek an ni lo. Spurs corner pet turah Marc Cucurella leh Micky van de Ven an lo inveng nasa deuh a, Cucurella hian Dutch defender hi a buan thlu.

Spurs-in penalty an beisei a, mahse, referee-in he thil a thlen lai hian ball a 'thi' niah a ngai a, penalty a pe lo. Hun a tawp zui a, point hlawh chhuak se him thei mai tur Spurs-in kut ruakin Stamford Bridge an hawsan.

Engtin nge?

Tottenham-in goal an khung hnuah an nawr na ve sawt a, mahse, awmzia a nei tawh lo. An penalty beisei pek an ni lo a, EPL aṭangin tla ta se, hahipin penalty pek an nih loh hi an la sawi ang!

Spurs hi table-ah 17-na an nih chhunzawm a, 18-na West Ham aia an sanna chu point hnih chauh a ni. Hammers hian an match tawp berah Leeds United an mikhual dawn a, Spurs hian Everton an mikhual dawn thung.

Tottenham hi West Ham aiin an dinhmun a la ṭha hret. EPL inhamtang turin draw result pawh a tawk thei - Spurs hian Everton hi draw se, Hammers-in Leeds hneh ta bawk se, an point hmuh zat a inang chiah dawn.

Mahse, goal difference-a team pahnih inthlauhna a sang lutuk hret a, Hammers tan Spurs um phak theih an ni tawh dawn lo. A hrilhfiah dan awlsam berah chuan Spurs tan EPL inhamtang turin draw a tawk a, Hammers tan an chak a, Spurs an tlawm bawk a ngai thung.