Inkhel hmuhnawmah Knicks an dingchang

NBA Eastern Conference Finals chu nimin zing khan khelh niin, New York Knicks chuan overtime khelh a nih hnuah 115-104 in Cleveland Cavaliers an hneh. Seven series game-ah hma an hruai a, 1973 hnua championship nomawi chawi leh turin kawng dik an zawh.

Madison Square Garden, New York-a inkhelah Cleveland-in bul an ṭan ṭha zawk a, first quarter chanve khelh thlengin hma an hruaiin James Harden leh Donovan Mitchell te an khel ṭha nghal.

Mahse Cavaliers a inthlahdah a, Knicks-in an vaw let ve nghal. Cavaliers hian holam taka ball an hloh bakah an basket a tang rei a, first quarter a tawp meuh chuan 23-16 in Knicks chu hmahruaitu zawk an ni a, an player pawimawh Jalen Brunson-a'n point 10 a nei nghal der.

Second quarter-ah Cavaliers an insiamṭha ve nghal a, Mitchell leh Harden bakah Evan Mobley leh Dean Wade te an khelh ṭhat bawk avangin point score lama an harsatna sut kianin a awm.

Knicks erawh an thiampuipa Brunson lachhuakin Jose Alvarado an luhtir a, Alvarado khel chhe lo mah se Brunson a tluk lohna a lang a, Cavs player te an insiamṭhat tawh bawk avangin ball kawl turin a ṭha tawk lo a, 48-46 a hnufual zawk chungin chawlhlawk an hmang.

Third quarter-ah pawh Cavaliers an chungung zawk a, player te kut kal lai a la reh lo a, point score lamah Knicks-in an ngam meuh lo. Knicks hian Brunson hoin an khel chhe chuang lo a, first leh second quarter-a an point score zat 23 tho an score, mahse Cavs player te an phur laklawh a, point 35 an score avangin 83-69 in hma an hruai chhunzawm.

Fourth quarter-ah hma an hruai fal avang leh an khel ṭhat avangin Cavaliers chu chak tura rin an ni hman tawh a, mahse Knicks tan Brunson a inlar a, team-in a mamawh laiin point a score thei a, a ṭhiante tan a siamsak thei bawk. Amah vengtu Harden-a'n a veng hneh meuh lo a, 101-101 a an inhnehtawk avangin overtime an khelh a ngai.

Overtime-ah Knicks an phur chhunzawm a, point 14 neiin an kut a kal sawt emaw tih tur khawpin overtime an ngam. Cavaliers erawh an zuih a, point thum bak overtime-ah an score theih loh avangin, game 1-ah an tlawm. May 22, Zirtawpni zing dar 5:30-ah an inhmachhawn leh dawn a, Cavaliers-in chak loh nawn an tum tawh dawn lo.