Champion lai hnehtu Tuichangral

Mizoram Rural Bank Pro Volleyball League khelh mekah Thawhlehni zan khan, Tuichangral chuan 17-25, 25-19, 21-25, 25-21, 15-12 (3-2) in Anastasia Electric Veng an hneh a, table-ah pathumnaah an awm zui.

Zanin dar 8:00-ah PVL khelh chhunzawm a ni dawn a, Khawbel leh Chhinga Veng Spikers te an inhmachhawn dawn. Inelna hi LPS Arena, Falkland-ah neih a ni a, a hmuna en man hi Rs.50 niin LPS YouTube channel (member only) hmangin a en theih bawk.

Tuichangral an huai

LPS Arena-ah rin hlawh zawk Anastasia-in set hmasa ber an awp bet hneh a, Karthik Madhu bakah Zomuana leh Dinsanga'n an ball hmuh vaw tla zelin Mama'n lehlam hlap a dang ṭha thei hle bawk. Tuichangralin vuak tlak an harsat rualin vawi khat mah lehlam hlap dang tla ve loin set khatna an hmang zo a, Electric Veng club el turin awmzia an nei pha lo.

Chiang taka set hmasa ber an hloh hnuah Tuichangral an insiamṭha a, an hmasawn nana pawimawh Lalrinpuia'n Anastasia ball vuak dangin taima takin a zuang a, team thar hlak ang maiin set hnihna atangin an inlan. Rinpuia'n point 13 hlawh chhuakin ṭum li chiah a tisual a, Saidingpuia Sailo chuan tum 11 hlap tlain point riat a hloh.

Sri Lanka aṭanga an lakluh Mahela Indeewar-a'n Tuichangral tan a theihna a lantir a, vawi 40 vaw tlain point 13 paih tel mah se mimalin a lamgsar. An khelh hnuhnun vawi hnihah Tuichangral an chak zawn a, Swiss League-a khel thin Mahela chuan hnehna kawngah team hruaiin Kuriz Player of the Match a zawnin a dawng.

A umtu zawk ni chungin Tuichangralin tha takin an bei let a, champion lai Anastasia lakah an mamawh rilru lama fiahna pawimawh tak pal tlangin hnehna an sual chhuakah a ngaih theih.

Champion lai

Anastasia tan an khelh hmasak vawi hnih aiin Khawhai tlangval Zomuansanga a che tha ve thung a, tum 25 hlap tlain point sarih a paih a, Karthik Madhu chuan vawi kua tisualin point 19 a hmu. Zosangzuala (Mama) chuan point 14 hmuin point li a paih a, set khatnaah Laldinsanga'n mittlung takin khel mah se set hnihna atangin chet a harsat a, vawi riat a vuak tlak laiin point nga a hloh. Champion lai hi khel chhia tia sawi a rem bik lo.

Electric Veng club an nghet tawk lo va, an hneh tawh TNT leh Khawbel lakah set hloh tel ve vein Tuichangral lakah vawi hnih set la hmasa zawk ni chungin an tlawm. Chutihrualin a chak lo zawk ni mah se set hnih an lak avangin point khat an neih belh a, khelh thumah point sarih hmuin anni aia vawi khat a khel tlem Hunthar leh Tuichangral aiin point khatin an sang zawk a, table chung berah an awm.