Russell-a'n rilru fim a put a ngai - Wolff

Mercedes team Principal Toto Wolff chuan Canadian Grand Prix lo awm turah George Russell chuan rilru fim a put a ngai tiin a sawi a, inelna hmasa lama a chet ṭhat tawk lohna chu theihngilh turin a duh.

Tun season-ah Russell-a'n bul a ṭan ṭha a, Australian Grand Prix-ah chak nghalin a phur hle, British driver hi Chinese GP-ah pahnihna ni chhunzawm mah se beisei a pha lo zui a, Japanese GP leh Miami GP-ah podium a lawn pha lo ve ve.

Russell chet ṭhat loh lai hian a teammate Andrea Kimi Antonelli chu mumang ramah a cheng ve thung a, kum 19 mi Antonelli hi Chinese GP aṭangin a zawnin vawi thum a chak tawh a, table-ah hmahruaitu niin F1 chanchinah hmahruai thei naupang ber a ni.

A teammate a tluk loh avangin Russell-a'n pressure a ngah a, Mercedes chhuahsan tur angin thuthang a awm hial. Wolff chuan, "Russell hian tawnhriat a ngah tawh a, tun hnaiah pressure a ngah avangin intlansiak lai pawhin rilru fim a pu thei lo a, chak a tum luat avangin a ṭang ulh ṭhin.

Mahse George hi driver thiam tak a ni a, a thiamna belhchhah turin a beidawng duh lo a, a chet ṭhat leh theih nan theihtawp a chhuah dawn tih ka chiang. Mahse chumi kawngah chuan rilru fim tak nen a beih a ngai dawn," a ti.

Canadian GP hi May 24, Pathianni zan dar 1:30-ah ṭan a ni dawn a, Russell leh Antonelli te hi mipui kit fukna a ni dawn a, anni bakah hian endurance race hmachhawn zo hlim Max Verstappen chu mipui ngaihven hlawh a ni leh ang.