India hmabak United States

India mipa leh hmeichhe hockey team tan Tokyo Olympic 2020 khel turin ram pakhat ve ve chiah paltlang tur a awm tawh. Mizo nula Lalremsiami Hmar telna India nulate chuan zanin dar 6:00 hian United States an hmachhawn dawn a, Inrinni zanah an match hnihna an khel zui leh dawn bawk.

Hockey thuneitu sang International Hockey Federation (FIH) ruahman angin ram pahnih hi vawi hnih an inkhel dawn a, vawi hnih an inkhelhna result hi khaikhawm tur niin an goal khung zat a inang a nih chuan penalty shootout hmangin chak zawk an zawng ang. 

Inelna hi Kalinga Hockey Stadium, Bhubaneswar-ah khelh tur a ni a, TV lam aṭang chuan Star Sports 1 leh Star Sports 1 HD-ah te live a en theih a ni dawn. India mipa team chuan Russia an hmachhawn thung dawn a ni. 

Olympic 2020-ah hian hockey huangah team 12 an inlan dawn. Khawmualpui ṭhenhran panga a champion te chu an tling nghal. Argentina (Pan American Games), South Africa (African Olympic Qualifier), Netherlands (Euro Hockey Championship), New Zealand (Oceania Cup) leh Japan (Asian Games) te chu an tling tawh.

Asia khawmualpui champion Japan hi a thlengtu an ni a, a thlengtu hi tlingsa an nih bawk avangin FIH Olympic Qualifiers aṭanga ram paruk tling tur chu pasarihah a pun belh phah. Siami awmna India hmeichhe team tan Olympic khel turin mahni muala US hneh a tawk tihna a ni. Mipa team lamin Russia an hneh a ngai thung.

Qualifier khel phak tur pawh hian kawng thui tak zawh hmasak a ngai. India nulate hi kumin August thla khan Olympic Test Event-ah an champion avangin qualifier hi an khel thei. Mipa team inlan theih chhan erawh FIH Series Finals-ah champion lo mah se final an luh phak vang a ni.

India nulate hi 2017 khan Asia Cup-ah an champion, hlawhtlinna an chan ṭum hian Lalremsiami Hmar chu player pawimawh a ni. Kolasib tleirawl hi India tan player pawimawh a ni chhunzawm zel a, Commonwealth Games leh Youth Olympic-ah te a khel ṭha thei hle.

September thla a Olympic Test Event an neih khan India hian inelna thlengtu Japan chu final-ah 2-1 in an hneh a, chakna goal hi Siami khung a ni. Asia champion an mualah ngei an luhchhuah thei tihna a ni, inrintawkna sang tak nen qualifier an khel thei dawn.

Tun hnaia world ranking chhuak tharah India hmeichhe team hi world number 9 an ni a, tun ṭuma an khingpui tur US hi number 13 an ni thung. Mipa team hi number 5 an ni phak, an elpui tur Russia hi 22-na daih an nih avangin India team pahnih tan Olympic luhna kawngka a inhawng zau.

India hmeichhe team hian Olympic qualifier khelh hma hian Spain leh Great Britain-ah tour an nei a, ram lian pahnih lakah an che chhe lo. US nen an inhmachhawn tur atan bik hian training an neihna a rei tawh a, September thla khan player fitness test pawh neih fel a ni daih tawh.

India coach Sjoerd Marijne chuan, "Team dang ngaihtuah hun a ni lo, inbuatsaihna ṭha tak kan neih avangin kan ṭhat dan bera khelh chhuah theih dan chauh kan ngaihtuah," a ti. India leh US hi an intawn hnuhnung ber chu 2018 Women's World Cup kha a ni a, 1-1 in an inhnehtawk.

US lam pawhin Olympic khelh ngei an tum, October 25 khan India ram an rawn thleng daih tawh. US coach Janneke Schopman chuan, "Tun hnaia India hmasawnna hi kan hmuh hmaih lo, keini lam pawhin inbuatsaihna kan nei ṭha tawk, nuamti takin kan khel ang," a ti.

Training kan nei hautak hle, Asian Games kan khelh zawh aṭang khan FIH Olympic Qualifiers atan hian kan inbuatsaih nghal char char. Match kan neih ho pawh hemi atana inzirna leh inpuahchahna ang zela kalpui a ni. US hi team khawng leh ṭha tak an ni a, thil tum inang nei kan nih avangin kan inkhel tur hi a hautak dawn. Inelna kan hmachhawn hnuhnung hoah kha chuan tlarhnung lam kan uluk a, tun ṭumah chuan goal nawr lam kan zir ngawrh hle thung. Player zawng zawng kan inpeih a, tunah chuan USA hmachhawn tur hian kan inpeih tawh khawp mai. - Remsiami 

Vanglaini chuan FIH Olympic Qualifiers khel tura awm mek Lalremsiami Hmar a be pawp a, Thenzawl Hockey Training Center aṭanga inzir chhuak Siami hian infiamna khawmpui lian an khelh theih ngei a beisei thu a sawi.