Vawiin dar 4-ah Chhingcows Vs Ramhlun North

Mizoram Premier League Season 8-ah beisei loh result a thleng chho a, vawiin tlai dar 4:00-a Chhinga Veng leh Ramhlun North inkhel tur pawh hi hriatthiam a har ta hle. 

Ramhlun North hian September 13, Zirtawpnia Chawnpui FC 3-0 ngawta an hneh hnuah October 29, Thawhlehni khan Chawnpui 2-1 in an hneh leh chiah. Jonathan C. Lalrintluanga (Thantea) hote hian heng inkhel pahnih kar leh hma lam hian point an hlawh chhuak miah lo a, tun ṭuma Chhinga Veng nena an inkhel tur hi fiahna tak tak a ni thei ang.

Chhinga Veng hian Kolasib-ah game mawi khelin Mizoram Police an hneh a, amaherawhchu Lammualah starting eleven pariat zet thlakin Chawnpui FC an hneh lo. Chhingcows hneh loh hi Ramhlun North-in vawi hnih an hneh theih a ni a, Thantea hote tan infuihna ṭha tak a ni thei ang.

Chutihrualin Chhingcows hian an match hnuhnung berah FC Venghnuai lakah point khat an hlawh chhuak leh tawh a, ball possession an ngah leh zawk tawh avangin Ramhlun North lakah rinkai zawk an ni ngei ang. Team pahnih hi round 5-a an inkhelh ṭumin Chhinga Veng 3-1 in an chak.