Zanin dar 7-ah Electric Veng Vs Police

Mizoram Premier League Season 8-ah semifinal khelh inbeisei pha team paruk an awm avangin inkhel boruak a sang chho a, zanin dar 7 hian champion inbeisei pha Electric Veng leh Mizoram Police an inhmachhawn dawn.

Police hian an match hnuhnung berah Chanmari FC hnehin phur chho viau mah se tun season-ah hian semifinal lut tura beiseiawm an hneh chu Chanmari chiah an ni. Lalbiaksanga Colney hote hi team dang pali Electric Veng, Aizawl FC, Chhinga Veng leh FC Venghnuai te lakah an chak lo vek.

Lalsangzuala Hmar enkawl Electric Veng hian Police hi 2-1 in an hneh tawh a, tun ṭuma an inkhel tur hi a pawimawh dawn. Electric Veng hian point 14 hmuin pahnihnaah an awm mek a, point 12 hmu tawh Police hi an chak a nih chuan table-ah an sang zawk dawn.

Electric Veng hian an match hnuhnung berah Aizawl FC an hneh loh avangin pressure an nei chho ṭan a, season liam ta khan hun rei tak table chung lamah awm mah se round 14-ah Police an hneh loh vangin knockout stage an thleng zo lo.

Tunah erawh Electric Vengin tawnhriat ngah coach Sanga an nei tawh a, hmabak erawh a harsa tho. Police coach BS-a Colney chuan, "Kan game plan thar a fuh a, Chanmari lakah a hlawhtling," tiin tlarhnunga panga dah chu an tihfuh thu a sawi a,  Electric Veng lakah Police-in an khelh dan thar an hmang nawn leh dawn a, Sanga leh a hoten engtin nge an chhanlet dawn tih hi en châkawm a ni.