Napoli-in Sarri koh kir an tum

Serie A club Napoli chuan an coach chhuak tur Antonio Conte thlak nan, an manager hlui Maurizio Sarri an ngaihven a, club president Aurelio De Laurentiis chuan Sarri hi a hlawh tur leh contract rei zawng tur thlengin a zawrh tawh niin an sawi.

Italian chanchinbu lar La Gazzetta dello Sport-in a tarlan dan chuan Napoli hian Sarri hi kum khata euro maktaduai 3.5 hlawh turin an sawm a, hei bakah hian an result a zira bonus dawn tur a awm tel bawk.

Lazio enkawl mektu Sarri pawhin a club hluia kir hi a hreh lo nia sawi a ni a, a kir a nih chuan kum hnih atan contract a ziak ang - tuna an inbiak dan ang chuan kum khat dang pawhsei theih tura tih a ni tel.

Kum 67 mi Sarri hian 2015-18 inkar khan Napoli hi a enkawl a, season khata point 91 lai hlawhchhuah ṭum pawh nei mah se, nomawi erawh a chawipui lo thung.

Napoli hi a chhuahsan hnuah Chelsea chu season khat enkawlin, Europa League-ah a champion pui a, Juventus-ah season khat vek kal lehin, Serie A nomawi a chawipui bawk - Juve hian a chhuahsan hnuah league nomawi an chawi leh tawh lo.

Sarri hian Juve a chhuahsan hnuah, kum khat chawlh lain, kum 2021 khan Lazio a enkawl a, mahse, March 2024 khan bangin, thla 15 zet a chawl zui. June 2025 khan Lazio-ah hian a kir leh a, mahse, tun hnaiah club president Claudio Lotito chu coaching staff-te chungah a lawm lo nia sawi a ni.

Napoli an lo lang vat a, Sarri lakluh ngei an tum. Hetihlai hian Lazio pawhin an club player hlui Miroslav Klose chu Sarri thlak turin an ngaihven - Klose hian German second division club FC Nürnberg a enkawl mek.