Bayern-in John Stones an ngaihven

German champion Bayern Munich chuan Manchester City aṭanga John Stones lakluh dan an ngaihven mek niin khawthlang media-te chuan an tarlang a, Etihad Stadium chhuahsan tur centre back hian German club hi a pan a nih chuan, City tana a khelhpui ṭhin, Bayern manager Vincent Kompany kaihhruaina hnuaiah a khel dawn tihna a ni.

Kum 31 mi Stones hian City-ah kum sawm zet a khelh hnuin, tun nipui transfer-a a contract zo tawh mai tur chu a pawt sei dawn lo a, Bayern tan John Stones-te ang 'class' a thlawna lakluh theihna chance hi bawhpelh phal chi a ni lo.

Hetihrual hian Stones hi tun hnaiah hliam vangin a talbuai ve fo a, match pawh a khel tam tawk lo. Kum 2016 khan Everton aṭangin City hi pound maktaduai 47.5-in a zawm a, Pep Guardiola-a'n City-a a player lakluh pahnihna a ni.

Manchester khaw club tan hian match 293 khel hmanin, goal 19 a khung a, Premier League nomawi paruk leh Champions League bakah FA Cup (3), League Cup (3) FA Community Shield (2), UEFA Super Cup leh FIFA Club World Cup-ah te champion nomawi a chawipui.

England tana vawi 87 inlan tawh defender hi a club hlui Everton pawhin lak kir an duh nia sawi a ni a, hetihlai hian Barcelona leh Premier League kai thar, Frank Lampard-a enkawl Coventry City hming lam rik a ni bawk - Bayern tan awlsam taka chan theih a ni dawn lo.