Silly Point: Kartawpah IPL Quarterfinal
Tata IPL 2026 chawhnu lam kan lo invaw kai leh ta der mai a. Team sawm zingah champion ngun ber Chennai Super Kings leh Mumbai Indians ten knockout stage an thleng pha dawn lo a, Delhi Capitals tan nomawi vuak chhuah hun a inher thei ngai dawn lo niin a ngaih theih bawk. Lucknow Super Giants lah an nawi tluan ṭhak ti ila, ṭawngkam na lutuk a ni lo ang chu maw.
A chhan
Chennai Super Kings tan MS Dhoni leh Stephen Fleming a te hun a inher liam ve tawh a tih theih a. Thil reng reng hi chu tawp chin (limit) nei a ni a, infiamna khawvelah nghat phei chuan coach/captain hmar kaitu, a administration thleng hian an vanglaiin tlang chhipa hlangkaitu ni mah se, expiry date a thlen hun hi a rawn inherchhuak ngei ngei ṭhin.
Delhi Capitals leh Mumbai Indians ten an star player-te khelh ṭhat tawk loh an tuar tih a chiang. LSG erawh an administration leh management chiri lutuk avanga tun dinhmun thleng a ni, ti ngam tur hian CBI nih kher a ngai lo.
Knockout lut turte
Nizan inkhelah knockout lut tawh Gujarat Titans leh tla tawh Chennai Super Kings te dinhmun kan hre hman lo a. Zaninah champion lai Royal Challengers Bengaluru leh Sunrisers Hyderabad intum a chak zawk zawk hi table topper tur an nih hmel. Chutihrualin Titans leh CSK inkhel result a pawimawh thei bawk.
A ngaihnawm lai ber chu knockout hmun khat ruak la awm inchuh team pathum Punjab Kings, Rajasthan Royals leh Kolkata Knight Riders hi an ni. League match bul ṭan ṭha, chawhnu lama zawi PBKS hian table mawngphah LSG an hneh chuan beiseina mei a la de ve dawn. Pathianni chawhnu inkhelah Mumbai Indians-in Rajasthan Royals an hneh a pawimawh tel ang.
League stage khar tur KKR pawhin beiseina chhi nung tur chuan Delhi Capitals a hneh ngei a ṭul bawk. Rajasthan Royals an chak erawh chuan point khata an chungnung dawn avangin PBKS leh KKR tan beisei tur a awm tawh lo thung ang.
Tactical
Kumin IPL-ah hian kum dang zawng aiin target um team tinin an hnehsawh leh zual a. Chuta thil chiang deuh chu innings tawp lama ball vaw thei impact player an hmang tangkai em em hi a ni a. Tin, pitch muang deuh hleka pace bowler ten cutter chi hrang hrang hman an uar lehzual hi thil langsar tak a ni.
A tawp bera ka thailan duh chu middle over (over 7-15 inkar) ah hian cricket game evolution kan hmu leh ta . Ṭum dang zawng aiin batting team ten ball an vaw nasa a, a tawp slog over atan khek lovin heng middle over kan tih ah hian batsman vaw thei leh hlap thei ten advantage an la nasa em em hi a ni awm e.
Tun kartawp league stage kharna tur chu quarterfinal a ni ta deuh ber mai awm a sin. Quarterfinal league en tui vek u.
