Maubawk leh Diakkawn an thiam ber

Mizoram Volleyball Association hnuaia inelna CK Hyundai Inter Village Volleyball Tournament 2019 chu Nilaini zan khan a hmawr bawkna neih a ni a, mipa inelna lamah Maubawk chuan Hunthar Veng 3-1 a hnehin an champion.

R. Dengṭhuama Hall-a inelna neihah hmeichhe final khelh hmasak a ni a, Aizawl khaw pawn team ṭha pahnih inkhelah Kolasib Diakkawn chuan Thenzawl East lakah 3-0 a hnehna changin an chungnung ber.

Mipa final a hmuhnawm, tualchhung volleyball thiam leh Pro Volleyball League (PVL) champion ni tawh Hunthar chu champion tura rinkai ni mah se Maubawk lakah set khat chauh an la. Maubawk hian semifinal-ah PVL club awmna Muanna Veng 3-0 ngawta an ngam tawh bawk avangin tun inelna bikah chuan team ṭha ber an ni tih a chiang. October 22-30 chhunga inelna neihah hian mipa team 52 an inlan a, hmeichhe inelna lamah team 18 an tel thung. Quarterfinal aṭangin player of the match thlan ziah a ni a, TATA Swatch Water Purifier (filter) pek zel an ni.