Inter Miami-in Casemiro la lut dawn

Lionel Messi khelhna Inter Miami chuan Manchester United midfielder Casemiro an la lut dawn a, Brazil international hi season tharah chuan Major League Soccer lamah kan hmu tawh dawn a nih hmel.

MLS-ah hian 'discovery rights' tih chu hman niin, club-in an player duhzawngte an list-a an dah chuan club dang tan lo dawr ve a thiang lo. LA Galaxy chuan Casemiro hi an 'list' ah an dah a, mahse, an indawr viau tawh hnuah an la inrem thei lo.

Hetiang boruak karah hian Inter Miami an lo lang a, Sir David Beckham-a club hian Miami lamah Brazilian midfielder hi thlem luh an tum. Amaherawhchu MLS dan angin, amah be hmasa tura 'discovery rights' neitu LA Galaxy nen pawh hian an inbiak rem a ngai tel dawn tihna a ni.

Kum 34 mi Casemiro hian tun season inelna hrang hrangah Manchester United tan match 35 khelin, goal kua a khung a, assist vawi hnih a nei tel. United-ah kum khat dang cham theihna dan nei mah se, club nen inbe remin, chhuah a thlang ta zawk.

Brazil tana vawi 84 inlana goal riat khungtu Casemiro hi World Cup 2026-ah pawh ram tan a inlan dawn a, a kum a tam ve tawh avangin a World Cup hnuhnung ber a nih a rinawm tawh.