Chhinga Vengin a mawnga awm TNT an hneh

Mizoram Rural Bank Pro Volleyball League khelh mekah Nilaini zan khan table mawng lam luahtu Chhinga Veng Spikers leh Thutak Nunpuitu Team an inhmachhawn a, Chhinga Vengin 19-25, 25-21, 25-20, 25-10 (3-1) in hnehna an chang.

PVL hi LPS Arena Falkland-ah khelh a ni a, a hmuna en man hi Rs.50 chauh a ni. Chhinga Veng hi zaninah an inkhel leh nghal dawn a, Khawbel nen an intawng dawn.

Chhinga Veng an insiamṭha

Kum khat an awl hnuah 2019 champion Chhinga Veng kir lehin, an khelh hmasak berah chak theihna hun ṭha an bawhpelh nasa a, Sihphir lakah set la hmasa zawk ni chungin vawi hnih hma an hruai a, mahse an inpawhthlaktir. Boruak chhiain um zuiin TNT hmaah thatho lo leh inman lo takin set khatna an hmang tluan a, setter C. Zonunmawia thlakin H. Lalruatsanga'n a tawp thleng a khel.

Set hnihnaah an insiamṭha a, a tawp thlenga an khelh ṭhat vangin TNT an dang hneh. An khelh hmasak aiin Chhinga Veng player-ten hma an sawn a, team pum pui chawi kangin league kal meka vawi hnih an khelh tawhah point li an hmu a, semi-final lut thei chin palinaah an insawn chho.

Spikers tan Vanlalṭanpuia'n point 15 hmuin point hnih chiah a paih a, Kuriz Player of the Match-a thlan a ni. Cuban player Morales Ponce De Leon chuan tum 22 vaw tlain point 13 a hloh a, match hmasa aiin TNT lakah a tisual tlem zawk. Captain Lalchungnunga'n point 14 a hmuh chanve a hloh tel a, H Malsawmsanga leh R Vanlalmawia'n point 10 chuang ve ve an hlawh chhuak bawk.

TNT an chuai

League kal meka vawi thum an khelh tawhah Mizo hlang awm chhun, TNT tlawm vekin point la hmu ve lo awm chhun an ni a, khelh thum an la nei. Chhinga Veng hmaah lehlam vuak dangtu ber Lalsaitluanga'n point thum hlohin 12 a hmu a, ball an pek tam ber C. Lalhriatpuia'n vawi 14 hlap tla mah se point kua a hloh. An player-te an intluk tlang viau mah se, an elpui team dang player nen khaikhinin hnuhma lian hnutchhiah thei an kawl lo a, an inlan tawhah khelh khata point 15 hmu tling an awm rih lo.

TNT player tam zawkin inelna sangah tawn hriat an tlachham a, set hmasa berah nung takin khel mah se set hnihna atangin ball vuak tlak an harsat a, an theihna a san tawk loh avangin bei ngial mah se tawp chin an nei. An khel rei tial tial a, hniam lam panin an inthlau telh telh a, set hnih an hloh zawn hnuah awmze neiin an bei let thei tawh lo a, set linaah point 10 chiah an hmu ve hman.

Kum 2023 champion team zinga tel captain Vanlalchhantluanga leh Laldinchhunga'n player naupang zawk ho khawmin, Mizoram inelna sang berah an ruh a la no deuh tih an khelh tawh atangin a lang chiang zel.