Thunder an tlu rei lo

NBA Conference Finals khelh mekah nimin zing khan Oklahoma City Thunder chuan 122-113 in San Antonio Spurs an hneh a, game 1-ah chak zo lo mah se Thunder an tho chhuak leh nghal a, seven series game-ah 1-1 in an inhnehtawk chiah.

Paycom Center, Oklahoma City-a inkhelah ṭan aṭangi team pahnihte an inhnehtawk a, inhlau bik an awm lo. Point score lamah harsatna an tawk lo a, 31-31 niin first quarter-ah chungnung zawk an awm lo.

Second quarter-ah erawh Thunder an chungnung zawk a, MVP Shai Gilgeous-Alexander, Luguentz Dort leh Cason Wallace te an khelh ṭha a, anni bakah hian game 1 a che ṭha tak Alex Caruso a la khel ṭha reng a, Caruso hian Victor Wembanyama a hlau lo. Spurs erawh an basket a tang a, OKC defence a khawng ṭhat bakah ball an hloh nasa a, 62-51 a hnufualin halftime an hmang.

Third quarter-ah Spurs-in hma an sawn a, Wemby leh Stephon Castle te an khel ṭha a, point an thawkchhuak hnem. Mahse OKC an inthlahdah bik lo a, SGA leh Caruso te kut a la kal reng avangin 96-88 in hma an hruai chhunzawm tho.

Fourth quarter-ah team pahnihte an inthlau lo a, Spurs-in na taka an nawr avangin an OKC an nihrual leh hman ṭep. Minute khat pawh awm tling tawh loah point ngain Spurs an hniam zawk a, mahse an inthlahdah avangin OKC zawkin point an nei a, point kuaa chak loin game 2-ah an tlawm.

Chak mah se Thunder-in thu lawmawm lo an nei a, hliam vanga lakchhuah Jalen Williams dinhmun a chiang lo. Williams hian minute sarih chiah an khel hman tihin a mal veilamah hliam a tuar a, a inkhel chhunzawm thei lo. A hliam hi endik leh tur niin a dinhmun a la chiang lo a, mahse game 3-a khelh theih a rinawm loh.

Williams tan season duhawm a ni lo a, hliam vangin match 33 zet khel thei loin a awm tawh. Hetihlai hian Spurs shooting guard Dylan Harper chu SGA nen ball an inchuhna lamah a ṭum sual a, a malpui ding lam tha a tihnat avangin third quarter-ah lakchhuah a ni bawk. Spurs rookie Harper pawh a dinhmun a chiang lo.

Team pahnihte hi May 23, Inrinni zing dar 6:00-ah an inhmachhawn leh dawn a, player inhliam an neih ve ve avangin chhuanlam neih a thiang lo. Series-ah 1-1 a an inhnehtawk tawh a. Conference Finals-ah chak an tum a nih chuan vawi khat chetsual a pawi thei tawh dawn.